Nga Ture Mo Te Utautanga o Nga Mea Whawhai.

No te mea kua whakatika etahi o nga Hapu o Nui tireni ki te whawhai ki a Te Kuini. No te mea hoki e tika ana kia whakaotia tenei whainga, a kia kaua e whakatika amuri ake nei etahi tangata ki te pehi i te mana o Te Kuini—kia kaua te rangimarietanga o tenei motu e whakaohokia. No konei he mea tika kia whakamutua te hoko, te utauta mai ra nei i te pu, i te paura, me era atu mea whawhai. Na! ko ahau, ko Te Kawana, ka whakatakoto i enei Ture.

1.	Na, ko ahau ko Te Kawana ka karanga kia kaua e hohoko kia kaua ano hoki e utaina mai te pu, te paura, me era atu mea whawhai; a, e tae atu te mana o tenei Ture ki nga wahi katoa o o enei Motu.
2.	Ko nga tangata katoa e utauta mai ana, e hokohoko ana ranei i te paura me era atu mea whawhai, e tika ana kia karangatia he utu mo tana he, a, ko nga moni e karangatia, ekore e kake ake i nga rau pauna e rima. Me he mea ka kitea he tangata e hokohoko ana, e utauta mai ana ra nei, e taria ana ra nei ki etahi wahi o tenei Motu te pu, era atu ra nei mea whawhai, (a kahore te pukapuka whakaae a Te Kawana i riro i a ratou,) ko reira, he mea tika kia tangohia katoatia aua pu, era ra nei mea whawhai e nga Apiha o Te Kuini; kia riro rawa aua mea katoa i a Te Kuini.
3.	Me he mea ka kawea mai kiuta, ka hokohokoa ra nei etahi paura, era atu ra nei mea whawai e te Kai-whakatere o tetahi kaipuke. Ko reira me utu tona hara ki nga pauna ekore e nui ake i nga rau erima; ko te kaipuke o aua mea whawhai, me nga taongo katoa o runga ka riro mo Te Kuini, ma ona Apiha e tango.
4.	Me he mea ka oati tetahi tangata ki te takotoranga o tetahi pu, paura ra nei, era atu ra nei mea whawhai i roto i te whare o tetahi tangata (kihai i whakaaetia e Te Kawana kia hoko) he mea tika kia tomo atu tetahi Kai-whakawa ki taua whare, he mea tika ano hoki kia hoatu i tona pukapuka ki tetahi atu tangata, kia ahei ai te tomo atu ki taua whare, kia eke atu ki te kaipuke ra nei, ki te pote ra nei, ki te waka maori ra nei, kia whakahaerea nga wahi ke ra nei, page breaka, me he mea ka kitea te pu, era atu ra nei mea whawhai, ko reira me whakawa taua tangata a, me utu tona hara ki nga pauna moni e hoki iho ana i nga rau erima; a, ko aua mea katoa i rokohanga i reira, ka riro rawa i a Te Kuini, ma ona Apiha e tango.
5.	Na! me he mea ka whakawakia tetahi tangata, a—me he mea ka kitea tona he—a, ka utua taua he ki nga pauna moni e hia ra nei, ka tika i reira kia karangatia e Te Kawana etahi ritenga ki nga tangata na ratou i korero te utanga mai, te hokonga ra nei o te pu me era atu mea whawhai; otiia, me wahi aua moni, mo Te Kuini etahi, ma nga tangata na ratou i kitea ai te hokonga o aua mea etahi.