E hoa ma,
E nga Rangatira Maori o , o hea, o hea. Tena ra koutou.
Kia rongo mai koutou ki taku tikanga mo te whawhai e whawhai mai nei ki Taranaki. Kua tae mai te rongo ki a au, meake pahorotia Te Karaka, ko nga tangata katoa o roto, wahine, tamariki, koroheke, ka whakamatea katoatia.
Ko tenei, e hoa ma, ekore e pai kia matakitaki kau atu tatou ki tenei mahi kino, whakangaro i te tangata. Ki taku, kua ea te mate o Rawiri i a Katatore; kua ea te mate o Katatore i a Rawiri, a me mutu te whawhai i konei. Na, kahore nei i mutu; engari kua kino rawa tenei. Inaianei ka whai tikanga ahau ki runga ki tenei mahi. Kei rapurapu mai koutou ki taku tikanga; he tikanga wawao taku i era wahine, tamariki, e noho ana i roto i Te Karaka, kei whakamatea harakoretia; na reira ahau i mea ai, kia tikina atu a Ihaia, kia tangohia mai i roto i taua pa, kia kawea atu he wahi ke; ma konei pea mutu ai. Ehara taku i te whakahoa ki a Ihaia ki a Wiremu Kingi ranei; ehara taku i te whakaora i a Ihaia; me he mea ko ia anake, kahore au e rere hei whakaora. Engari he mea naku kia araia tenei mahi huna i te tangata: titiro atu ana ahau, ko Ihaia te take; na reira ahau i mea ai, ko ia kai unuhia mai, kia wawe te mutu.
Tetahi take i whai tikanga ai ahau inaianei; he tupato noku kei uru te Pakeha ki roto ki tenei whawhai, me he mea ka waiho noa iho. Kua wahi iti i nga ra kua pahure ake nei; a me he mea ka tukua tenei wahi e meatia nei meake pahorotia te pa o Ihaia, ekore pea e taea te pupuri kia atea tonu nga Pakeha o Taranaki.
Tetahi hoki; ekore e mutu te whawhai i te horonga o te Karaka; engari, katahi ka nui haere, ka uru ano hoki era atu iwi kahore nei i uru noa inaianei.
Na, e hoa ma, he kupu tenei ki a koutou, e nga Rangatira, kia uru tahi tatou ki te pehi i tenei kino; na reira taku pukapuka i tuhituhi ai ki a koutou. Tetahi, kia mohio ai koutou ki taku tikanga, he tikanga whakaora i te tangata: kei whakarongo hoki koutou ki te korero hanga noa iho a te tangata.
Na to koutou matua aroha,
Na te Kawana.