Title: Proceedings of of the Kohimarama Conference, Comprising Nos. 13 to 18 of the “Maori Messenger.”

Publication details: Auckland

Part of: He reo ture nō te taha Kāwana / Language of the Crown

License: Creative Commons Attribution-Share Alike 3.0 New Zealand Licence

Na Te Tawera.

(Rarangi) 6. Ae, kaore e huna e matou nga mea kino, me he mea ka kitea e matou. Na, whakarongo mai ki taku korero atu ki a koutou. Ka taea ano e koutou, no te mea he iwi matau koutou ki te rapu tikanga mo a matou he ka tukua atu nei ki te ture a te Kuini—to taua Kuini. Na, whakarongo! E pai ana ahau kia tiakina aku taonga, aku whenua, e te ture o to tatou Kuini, mo te tangata mahi he kia whiua; ahakoa pononga, ahakoa rangatira, ka tukua atu ki a koutou, nona i mahi he; mo te tangata tautohetehe kia whakaritea paitia, kia rite ai ki te ture o to tatou Ariki i te Rangi. Na, tenei tetahi: kaua e noho ki te riri, engari kia manawanui. Kei hohoro ki te whawhai. Waiho Waikato i kona mea noa ai, he kuaretanga no te whakaaro, i whakaaro kingi ai mo ratou hei tango i te maru o te Kuini. Na, tenei tetahi: kaua e whakataria te whawhakaaro kei waiho hei take he ki a tatou, Whakarongo mai! E mea ana toku whakaaro, ka tika tou tupato ki a koe, no te mea he takahi i tou mana. E pa, tena koutou, te matua o nga tauiwi o tenei motu, te matua o nga pani, o nga pouaru, page 22 o nga turoro, o nga tamariki Maori, Pakeha.!

(Rarangi) 10. Ae. ka tika tau whakaaro, ka whakaae ahau ki to korero pai ki o tamariki kua motuhia atu na mou, kua honoa atu ki to Ingarani ritenga, kia waiho ko te maru o te Kuini ki runga i a matou mau ai ake ake, amene!

(Rarangi) 11. Kua koa au kia hoki mai toku whenua ki ahau. Ae. Kua tae au ki te whare whakawa ki te rapu tikanga mo toku kaipuke, imua, i te tau 1859, no reira ka kite ahau i a te ture mahi. E pai ana ano kia piri matou ki te Kuini hei matua mo matou mo ake tonu atu. To tatou tumuaki, ko nga Pakeha ka honoa ki nga Maori—ka honoa ki te oriwa pai. Na, tenei ano te kupu: na te kuaretanga i heke ai te toto ki Niu Tirani, a me pehi i ona kuaretanga. Na, tenei ano tetahi kupu: no nga Pakeha te hara nui hoki—te kupu penei o nga Pakeha, "nokuru te Maori, haere ki waho." Kei waho ano e haere noa atu ana, he kauga noa mai ki te tangata. Ko aua ture ano nga ture kino o nga Pakeha e noho nei tatou i to tatou kainga. Ko te tini noa iho o nga hara o te Pakeha, o te Maori; na konei i he ai nga whakaaro, ka rere ke o matou, ka rere ke o koutou na whakaaro, wehe ke atu ana to koutou, wehe ke mai ana to matou. He kupu no to tatou Matua i te Rangi, "He tangi nui taku tangi, ko te mamae hoki kei toku ngakau e kore e mutumutu." Na, he whaki hara tenei naku ki a koe: ko te hara kohuru, ko te hara tango whenua, ko te hara puremu, ko te hara kanga, ko te hara maminga, ko te hara tautohetohe, ko te hara whakahihi, ko te hara mauahara, tahae, ko te hara makutu, ko te hara taunu, ko te hara riri, ko te hara korero teka, ko te hara whakatoi. Heoi ano, ka mutu. Na, e kore matou e mohio ki te rapu i au whakaaro i korero mai nei ki a matou, no te mea he hunga kuare matou ki te rapu whakaaro i o koutou ture, i o koutou ritenga pai, e tu nei i Akarana. Na, whakarongo mai ki te kupu o te Atua, "Hohoro te hohou i te rongo ki tou hoa whawhai i a korua ano i te huarahi." Na, tenei hoki tetahi kupu ki a koe: kahore au i kite i te he i a koe, i o korero i tuhituhi mai nei ki a matou i to pukapuka. Heoi ano aku whakaaro, kua pau.