Mo te Runanga ki Te Pokiha raua ko te Pere,—
Kei te miharo au ki te ahua pai o nga tikanga e tu mai i Waikato nei, ko te kino ia kei nga Rangatira kaumatua. Otira i te rongona ki aku take i whakapuaki ai, ka miharo aua Rangatira ka mea, mei haereere tonu atu au i nga wa i tu ai te Kingi Maori, ara nga Runanga, whakapuaki ai su i aku take, kaore pea i tino pokake nga ritenga a nga iwi i whakatu Kingi nei. Aku take I whakapuaki ai; ko te kawenata o Waitangi, me nga pai o te kupu a Kuini mo nga iwi Maori, e mau tona ana te mana o tana Tiriti. Ko te whakapono ta nga minita me nga kura, me nga minita Maori i tupu nei i roto. Ko te Tiriti o Kohimarama, apitiria ana te Tiriti o Waitangi.
Me te nupepa o Kawana i tukua mai ki te hui i Ngaruawahia, rite tonu ki te mana o te Tiriti o Waitangi. Ko te ahua pai o nga iwi e rua e whakatupu nei i te pai ki tenei motu.
Na tenei taku kupu. He mea noa iho te Kingitanga Maori ki taku whakaaro, heoi ano te mea nui i roto i nga iwi Maori i whakatu kingi nei, ko te whakakake. Me he mea, e pai ana koe, e Wiremu Tamehana, kia whiriwhiria au Rangatira me koe ano hoki kia haere ki Akarana. Kia tu tahi ki roto i nga Runanga whakatakoto tikanga mo tenei motu, kua kore e whawhaitia, kua waiho te whawhai, ko te komiti anake ana! He rongo mau te tukunga iho.
I te mutunga o aku kupu, ka whakaae mai a Wiremu Tamehana kia haere mai. Otira, ko te wa hei taenga mai ko te hui e haere ake nei, he whakahau tana kia turia taua hui. Erangi ko ana korero, me ta ki te nupepa i karanga mai ai ki au.