He Kupu na Maketu ki a Te Kawana Kerei mo Ngatiawa i Te Whare-herehere

He Kupu Na Maketu Ki A Te Kawana Kerei Mo Ngatiawa I Te Whare-Herehere.

Ki a Ta Hori Kerei, Kawana o nui Tireni. Kia ora koe o to matou ariki e ora ana a Ihowa tou Atua, e ora ana hoki tou wairua, a ma Ihowa e whakariterite tou whakawakanga, mo nga herehere e piko nei i raro i tau ringaringa kaha.

Tena kia mana tena tononga o ou hoa pononga e whakawhirinaki nei i raro nga takahanga o ou waewae.

Rere! Kua mana hoki au whakahaunga i tou iwi i a te Arawa, kua hopukia ruruatia te pai me te kino, te kaha me te ngoikore, a kaore tetahi mea i hapa o au i homai ai ki a matou.

He tono tenei i runga i te ngakau whakaiti kia whakahipaia te mate o te ripeka i nga herehere o Awa kia tuturu ai tenei ki kei runga i au pokohiwi e pikau aua tou iwi Maori ahakoa tangata kino tangata pai.

Tenei te kupu, kua ata haere ou pononga ki te tono i aua tangata i runga i te warati, whakatika mai ana me nga mea whawhai, heoi na te Atua i arai atu te mate i a matou, a hopukia ruruatia ratou, e rua, e rua, a kua hoatu ora ki tou ringaringa i te marama o oketopa tae noa ki tenei marama. Whakahokia oratia mai hoki e koe i runga i tenei tono o au hoa iti nga herehere katoa, kaua he toenga, kia rite ai tenei kupu tumanako a matou mou,— –He kohatu kaha koe i waenga nui i nga ra hau, i nga rangi marino, i nga po, i nga awatea, i nga raumati, i nga hotoke, i te matao, i te werawera.

Hei konei matou tatari atu ai na o hoa pononga iti.