[Circular, 16 January 1871, about voting procedures in Eastern Māori]

He kupu atu tenei naku ki a koutou kia rongo mai koutou ko te ra kua whakaritea mai e te Kawana hei whakaturanga i tetahi tangata maori mo te Runanga Nui o Niu Tirani i te Parimata e takoto tata mai nei ara, ko te Tuatahi o nga ra o Pepuere 1871—hei tangata ia mo te Takiwa ki te Taha Rawhiti o Niu Tirani.

Ko te tikanga tenei kua oti te whakatakoto e te Kawanatanga ko nga tangata e meatia ana kia karangatia hei tangata mo te Runanga me haere katoa mai ki Nepia nei i taua ra, me haere tahi mai me tona tangata hei karanga i tona ingoa i te whakahuatanga me tona tangata hei tuara mona. Ki te mea he tokorua he tokotoru ranei nga tangata e karangatia ana, a e kore ana e rite te tangata e tu i taua ra, penei katahi ka whakaturia te Pootitanga i Nepia i te te kau ma toru o Pepuere, i Porangahau hoki, i Waipawa, i Te Wairoa, i Turanga, i Tuparoa, i Waiapu, i Opotiki, i Maketu, i Tapuaehararu, i Wairarapa, i Ohinemutu hoki—i taua ra katoa, i te 13 o Pepuere. He mea hoki kia tika ai nga tangata i te Pootitanga ki te kai whiri i ta ratou tangata e pai ai hei tangata mo ratou ki te Parimata. Na, ko te otinga o te Pootitanga i nga kainga katoa, ka panuitia i Nepia i te rua te kau ma rima o nga ra o Pepuere kia mohiotia ai te tangata kua tu.