Ki te whakaminenga o Niu Tireni e noho nei kei te Parameta : tenei petihana no matou no nga tangata Maori e mau nei o matou ingoa kiraro ake nei, no Haki Pei, no Wairarapa, no te Wairoa, no Turanganui.

Na nga ture e mau tonu i whakaputa i nga kino ka tuhia iho nei—a, i whakatupu hoki i te mate mo nga iwi tangata Maori.

Tuatahi—I te timatanga, pau ana nga whenua, i te utu mo te ruritanga, mo te Kooti, mo nga karaati, mo nga roia, me nga kaiwhakamaori, me era atu utu, a, koia ano i iti rawa iho ai te whenua, e toe nei kia matou.

Tuarua—He torutoru nga ingoa tangata i tuhia kiroto i nga karaati, o nga whenua nunui: a, ekore hoki e tiakina te mana o te iwi nona ake te whenua, no te kore maunga o ratou ingoa i te karaati. Koia hoki, ka taea te reti, me te whakatina, me te hoko i te whenua, e nga tangata i te karaati, hei painga mo ratou ake ano, kihai tenei mahi i mohiotia, i whakaaetia, e nga tangata o waho, me te kore o ratou uru ki nga moni i puta mai i te reti, i te hoko ranei.

Tuatoru—He tini nga tangata e mau nei o ratou ingoa ki nga karaati, a e kore hoki e rite tonu to ratou take ki te whenua; he nui to etahi, he iti to etahi—e kore hoki te ture e ata rapu marire i te take o ia tangata, o ia tangata, i roto i te karaati, kua oti ke te whenua te reti ki te pakeha; penei, imuri i te reti, ka hokona te wahi o etahi, ka puritia to etahi, akuanei, e kore e taea te rapu i te wahi o nga tangata, kahore i hokona to ratou whenua.

Tuawha—He huarahi mama tenei mo nga tangata kuare, e whai whenua ana, a e kore hoki era atu tangata e whakaarohia.

Tuarima—Kihai hoki i ata oti marire tetahi ritenga, hei whakapumau kia matou nga kupu whakahaere me nga kupu whakamarama o nga pakeha mohio; o nga pakeha ekore nei e uru ki te hoko whenua, tatemea, kei te takiwa e tuhituhi ana i o ratou ingoa ki nga pukapuka tuku whenua, heoi nei te whakamaramatanga, ko to nga paheha pu ano, e kaika ana kia mau nga ingoa o nga tangata ki te pukapuka tuku i te whenua.

Tuaono—Ekore e whakaarohia tetahi ritenga e tika ai te utu mo te whenua, ina ka hokona, retia ranei; noho kuare ana hoki nga tangata Maori ki te take e koni ai te utu mo te whenua. Koia ratou ka riro tonu nei i te whakawai ki te reti, ki te hoko ranei i te whenua, ko te utu ia, he utu iti rawa iho i te utu e paingia e ratou, i to ratou hokohoko whakapakeha.

Tuawhitu—He mea ano, ko tapoko te ingoa o tetahi tamaiti, wahine marena ranei—pena ka haere noa atu te kaiwhakamaori ki taua tamaiti, ki taua wahine ranei meinga ai kia tuhia tona ingoa—a, e hara nei hoki tenei i te tikanga mo nga wahine, me nga tamariki pakeha.

Tuawaru—E kore tetahi whenua e tohungia, hei nohoanga, hei oranga ano mo nga tangata Maori—inahoki he tokomaha nga tangata, kua pau rawa atu to ratou whenua, a kahore rawa nei he piihi, hei nohoanga, hei mahinga ranei.

Tuaiwa—E tukua noatia ana nga pakeha ki te hoko i te wahi kotahi o ia tangata, o ia tangata, i roto i te karaati; e kore hoki tetahi tangata e mohio i te whakaritenga a tetahi, engari me huihui tonu nga tangata i te karaati, ki te kore ratou e noho tahi, me kati rawa te hoko i te whenua.