Other formats

    Adobe Portable Document Format file (facsimile images)   TEI XML file   ePub eBook file  

Connect

    mail icontwitter iconBlogspot iconrss icon

[Proceedings of some conferences held by Te Aute College Students' Association, 1897-1901, 1906]

Te Ratapu te 9 o Tihema. — Nga Mahi Karakia

Te Ratapu te 9 o Tihema.
Nga Mahi Karakia.

I Ia ata, i ia ahiahi, he karakia tonu te mahi ki te whare karakia; nga kai karakia ko Revs. Perere Peneti, Hemi Huata, Katene Pukerua, Mokai Kereru, me Te I wiora Tamaiparea raua ko Reweti Kohere. I te ata o te Ratapu i a Te Wiremu te kupu. I tohutohu ia ki tana whanau kia maia, kia toa. Ko Maata keeti i Kauwhau i te whare karakia o tetahi wehenga o te Hahi Weteriana. I muri i te tina ka hui nga tamariki ki te whare karakia ki te kura Ratapu, ko Apirana Ngata ki nga taane, ko Maata Keeti ki nga tamariki page 16wahine, ko Terei Ngatai ki nga tamariki tane ririki, ko nga minita ano ki a ratou whakaminita.

I te hiahia ka whakahoroa nga whare karakia o te pakeha e te Kotahitanga o Te Aute, i a ratou nga kauwhau.I te Hahi o Ingarangi ko Rev. Perere Peneti, i to te Perehipitiana ko Te Tatana, i to te Weteriana ko Reweti Kohere, i to tetahi atu Hahi ano ko Ware Waitai. Kotahi tonu ta ratou tino kupu ko te whakaatu i nga mate o te iwi Maori, ko te tono hoki ki te pakeha kia aroha mai kia awhina. I miharo a Whanganui i te tuunga he Maori ki roto ki nga whare karakia o te pakeha kauwhau ai.

Ka kitea i reira te pai o te tu o nga hui a te Kotahitanga ki te taha o nga taone kia taea ai te whakamarama ana mahi, te whakahaere ana tikanga, ki mua i nga iwi e rua. No tenei Ratapu i ata titiro ai te pakeha ki te kaha o te wairua e toko ake nei i roto i nga tamariki o Te Aute, me o ratou hoa o era atu kareti Maori. E ki ana tetahi kupu o te kauwhau a Perere Peneti. "Na koutou na te pakeha i hari mai te purapura pai te purapura kino: te rai-karaihe raua ko te koroa i te taha o te tumatakuru raua ko te tataramoa. Kihei matou i ata whakaakona e koutou ki te whakatupu o tetahi e kaha ai, ki te ngaki o tetahi e mate ai. Ko tona tukunga iho i roto i enei ra kua huna te purapura pai e te mea kino, kua tukua e koutou kia uruuruatia te whenua, kia ngaromia e te kino. Ma koutou ano e tiki mai e ngaki nga tataramoa nga tumatakuru."

I te mutunga o te kauwhau a Peneti ka himenetia e te ope waiata o Putiki ratou ko nga tamariki o Te Aute te himene nei "Piko nei te matenga." He nui te pai o ta ratou himene: i nui te whakamihi o nga pakeha.