Other formats

    TEI XML file   ePub eBook file  

Connect

    mail icontwitter iconBlogspot iconrss icon

Forest Lore of the Maori

12 — Te iwi moa o Aotea — Na Ngati Awa ki Te Teko

12
Te iwi moa o Aotea

Na Ngati Awa ki Te Teko

Ko tetahi iwi o te motu nei, taua, iwi he moa, te ahua penei ano i te tangata nei te ahua, te tinana, e rua ano waewae, e rua ano ringaringa, me te mahunga ano, me te waha ano, kaore e korero ana. Kotahi te page 395waewae pepeke, kotahi te waewae tu, ko te waha hamama tonu ai. Te kai oranga mona he hau, pa mai te hau a uru hamama tonu te waha ki te hau a uru; nga hau katoa, ahakoa marangai, he kai katoa na taua iwi.

Ka haere atu tetehi tupuna, ko Apa taua tupuna, ka tae ki te taha ki te uru o Putauaki, rokohina atu e taua tupuna, e Apa, e tu ana taua tangata, ara te moa, penei tonu te ahua i te tangata nei. Katahi ka tapahia e Apa i te waewae tu, katahi ka whanoa e te waewae e pepeke ana o taua tangata, taka tonu atu taua tupuna, a Apa, i te pari, mate tonu atu. Taua iwi pepeke nei te waewae kua ngaro, na nga tupuna taua iwi i patupatu. Kaore i hapa nga wheua i te iwi o te kau nei, penei tonu te nunui o te iwi; i kite au i nga iwi i te take o Tawhiuau. Tetehi huruhuru penei i te huruhuru manu kei roto i nga keke e tupu ana; he pare rangatira taua tu pare, penei tonu i te huruhuru manu, te ingoa o taua huruhuru ko te Rau o Piopio. Nga pare rangatira tenei, he huia ka rua, a he kotuku ka toru nga pare rangatira; ka mate nga tangata nunui o te iwi Maori ka titi aua pare e toru ki te tupapaku, a ka tangi te iwi.

Me korero ano e au, te tangata i taka nei ki te pari, huaina iho te ingoa o te pari ko Takanga o Apa, kei te pari te ingoa tuturu. E hoa! He moa te ingoa o te tangata o taua tu iwi; nga morehu e kiia ana kei runga i nga maunga, i nga pari, i nga awaawa kei Tawhiuau, i reira nga tangata Maori e kimi ana, me te Pakeha, i roto i te takiwa o te Whakapono nei, kaore i kitea. Kia mohio koe ko tenei tangata ko te moa, ona wheua penei i te iwi kau, i te iwi tohora, he uri ano no Tinirau, no Tutunui.