14
Mahinga manu

Ngati Porou.

Ko te patu o te kaka, tuatahi he wero ki te tao i te takiwa o te tawari, o te kohai, o te whinau.

Tuarua, hopu ai te kaka hei mokai, ka hanga he whare kaponga ka whakaturia he rongohua ki waho, ka matitia te mokai kaka ki raro iho o te rongohua; ko te tangata ki roto o te whare kaponga, me te kaha he mea here ki runga o te rakau, ka whakangengetia te mokai kaka, ka rere mai nga kaka, ka tau ki runga o te rongohua, ka potaea atu e te tangata ki te kaha, ka kumea mai ka mate.

Tuatoru he mea hanga ki te rakau tiketike hei tutu, ka mahia he whare ki runga, ko nga rau ano o taua rakau, ka whatawhatatia he nohoanga mo te tangata, ka whakaturia nga pou mo nga mutu, ara mo nga peke. He kotahi iari te teitei ki runga ake o te whare i te tihi o taua rakau. E wha, e ono, e waru nga peke; ko te mokai ki waenganui o ana mutu. Ka whakangetia te mokai, ka tiro mai nga kaka, ka rere mai, ka tau ki runga ki nga peke, ka takiritia e te tangata, e nga tangata ranei, ka mau nga waewae o nga manu, ka tukua iho ki raro, ka patua, ka mate, ka whakahokia te mutu ki tona iringa; ka eke ano he manu, ka peratia ano me te tuatahi, a pau noa te pokai, Ko te kereru, te patu tuatahi he wero ki te tao i runga toromiro me etahi atu kakano.

Tuarua he taeke i runga rakau, he taeke i nga wai e inumia ana e te manu. Te taeke he mea hanga ki te rakau hei turuturu, ka whakamaua te rongohua hei taunga atu mo nga manu, ka whakamarotia te tahu o nga kaha ki runga ake o te rongohua, ka rere mai nga manu ka tau ki runga o te rongohua, ka mau nga kaki i nga kaha, ka haere atu te tangata ki te ui i nga manu i runga o nga kaha.