E te ope tuatahi
No Aotearoa,
No Te Wai-pounamu,
No nga tai e wha.
Ko koutou ena
E nga rau e rima,
Ko te Hokowhitu toa
A Tu-mata-uenga:
I hinga ki Ihipa,
Ki Karipori ra ia;
E ngau nei te aroha,
Me te mamae.

E te ope tuarua,
No Mahaki rawa,
Na Hauiti koe,
Na Porourangi:
I haere ai Henare
Me to Wiwi,
I patu ki te pakanga,
Ki Paranihi ra ia.
Ko wai he morehu
Hei kawe korero
Ki te iwi nui e,
E taukuri nei?

E te ope tuaiwa
No Te Arawa,
No Te Tai-rawhiti,
No Kahungunu.
E haere ana 'hau
Ki runga o Wiwi
Ki reira 'hau nei,
E tangi ai.
Me mihi kau atu
I te nuku o te whenua,
Hei konei ra e,
E te tau pumau.