The Laws of England, Compiled and translated into the Māori language.
§ 34.—Runanga huuri
[ko te tohutoro i roto i te reo Pākehā]
§ 34.—Runanga huuri
Te RunangaHuuri. Kotahi tekau ma rua nga tangata o to Runanga Huuri. He mea Hamene nga tangata, ara, he mea karanga na te Heriwhi kia haere mai ki te Whare-whakawa hei Runanga whakarongo whakawa mo te Kooti Hupirimi. Kei nga whakawakanga ki nga Kooti o nga Kai-whakarite-whakawa Tuturu, kahore he Huuri. Kotahi tonu ia te wahi e whai Huuri ai.
E peneitia ana te whakaritenga tangata mo te Runanga Huuri. Ko nga ingoa katoa o nga Hitiheua, ara, o nga tangata kua whai tikanga tangata whenua, kua 21 hoki nga tau, a kahore ano i 60 noa, ka tuhia ki roto ki tetahi pukapuka. Kei te Heriwhi taua pukapuka e takoto ana. He mea tuhituhi ki te ritenga o nga reta timatanga o o ratou ingoa. Na, ka meatia kia whakanohoia tetahi Huuri, ka hamenetia atu e te Heriwhi e toru tekau ma ono nga tangata. Ka timata ki te ingoa tuatahi e mau ana i te pukapuka, haere tonu, taea noatia te Toru tekau ma ono o nga ingoa,—ka mutu. Kahore i waiho ma te Heriwhi te whakaaro ki ana tangata e karanga ai hei tangata mo te Huuri. Kei te reta o te ingoa te tikanga, kahore hoki e tipokapoka; ka haere whakatepe tonu; ka timatai te A, haere iho, poto noa nga ingoa o te pukapuka: ka mene, ka timata ano. Na reira, ekore e taea te kowhiti mo te Huuri ko nga tangata e wharara te whakaaro ki tetahi taha ki tetahi taha ranei.
Na, ka taka ki te ra i whakaritea hei haerenga mai ma ratou ki te Whare-whakawa, ka tuhituhia e te Rehita, Kai-tuhituhi o te Kooti, o ratou ingoa ki nga pukapuka e toru tekau ma ono, ka maka ki roto ki tetahi pouaka, ka whakaoioia; na, ka tangohia takitahitia mai me te panui i te ingoa i tangohia mai, me te karanga i te tangata nona tera ingoa kia haere mai. Penei tonu te mahi, rite noa te Kotahi tekau ma rua hei Runanga-Huuri.
Ka oti enei te whakanoho, ka whakaoatitia ia tangata ia tangata o ratou e te Rehita, kia tika, kia pono, tana korero ki runga ki te mea ka whakawakia. Ka turi tetahi tangata i hamenetia kia haere mai hei tangata mo te Huuri, ka noho atu, ka Whainetia ia, ara, ka meinga kia utu, engari, kaua e neke ake i te Tekau Pauna. He mea ata whakarite marie nga tikanga whakahaere o te Ture kia kore ai he raruraru.