[ko te tohutoro i roto i te reo Pākehā]

§ 8.

Ko te mahi he ki te iwi nui tonu, ara, ko te Hara-Kirimina, e kore e waiho e te Ture ma te tangata i mate i taua mahi he, ma ona whanaunga ranei, te whakaaro kia kawea kia kaua ranei e kawea kia whakawakia. Ko ta te Ture i whakarite ai mo enei tu mahi he, mo nga Hara-Kirimina, ma te Kuini ano, ma te Kawana ranei, ratou ko nga Kai-whakarite-whakawa te whakaaro, te mahi, kei tukua noatia te hara pera, engari, kia whakawakia ano. Te ingoa o enei tu mahi he, ko nga "Hara-Kirimina"; koia nei ko te Whakamate-tangata; ko te Tahu-whare ki te ahi; ko te Rere kino ki te tangata; ko nga mea pera.

Ki ta te Ture tikanga, ehara te Hara-Kirimina i te hara ki te tangata anake i mate, erangi he hara ia ki te Iwi katoa; ara, te hara pera me enei i meatia ake nei, na reira ka meinga ma nga Kai-whakarite whakawa e mahi, e mea kia whakawakia.

Ko te whiu e whakaritea ana mo tenei tu hara, he mea rererere ke; mo te Hara nui, ko te Whiu nui; mo te Hara iti, ko te Whiu iti: he Whakamate mo etahi; he Whareherehere mo etahi; he Utu mo etahi, ara, he "Utu-whaine" ta te Pakeha ingoa mo taua utu.