[ko te tohutoro i roto i te reo Pākehā]

9. Huaki.—Here Kino ki te Tangata.

Ko te tangata ka whakauru ka whakaako atu ki tetahi e mea ana i tenei Hara, e ahei ana kia peratia ia me te tangata nana pu te Hara.

Ka meinga ano hei Huaki, me he mea ka whakakihia te kuri kia ngau i tetahi tangata.

Ka meinga ano hei Huaki me he mea ka haere hoiho tetahi tangata i runga i tetahi ka akina whakaarotia ranei ki te kaata, whara iho te tangata.

Ka meinga hei Huaki ki te pa te ringa o te tangata ki te kotiro, he tikanga puremu, ki te mea kihai te kotiro i whakaae.

Ka meinga hei Huaki me he mea he tautakitahi ana tetahi tokorua, u ana te patu, te moto ranei, a tetahi o raua ki tetahi atu tangata, he mea ohia noa.

Me he mea kei te mahi tetahi Katipa, kei te pehi, kei te whakaatiati i te ririri, turia ana mai e tetahi tangata; he mea nana, he arai i ta taua katipa; e pai ana kia hopu te katipa i taua tangata.

Ki te tomo kino te tangata ki roto ki te whare o tetahi, e pai ana kia peia maoritia mai e te tangata nona te whare. Engari me i tomo pai marire atu ki te whare, me matua korero kia haere ki waho, ka tika ai tana pei maori mai. Ko te mea tika ia, ki te pokanoa mai tetahi tangata, me matua korero marire ki a ia kia haere atu, kia kaati ranei tana mahi pokanoa, a kaua e timata te patu i a ia, ahakoa pokanoa mai te panga o taua tangata ki a ia ki ona mea ranei. Ki te kore te tangata e rongo, e whakamutu i tana mahi pokanoa, me pa pai nga ringaringa ki te pana i a ia, kauaka hei te pana kino; waiho mana e whakanehenehe mai, ka whakakaha i te pana. Ko te mea pai rawa ia, me he mea e ahei ana te waiho, me waiho ma te Ture ano.

Tetahi tikanga o te Huaki, e ahei ana te whakarite ki runga ki te tikanga whakautu. (Tirohia Nga Hara Hiwhiri.)