Ko Nga Moteatea, Me Nga Hakirara O Nga Maori
KO TE TANGI, A TE UAMAIRANGI, MO TONA WHARE
KO TE TANGI, A TE UAMAIRANGI, MO TONA WHARE.
E tu re e, whare e,
Ka mahue koe,
Whaihanga ra, e te Tuturi e;
Tarei ra, e te Pepeke;
Ka tau te tini o te Hakuturi, i tana tau e
Ko te Warakitauranga ra
Rere mai te maramara e,
Kei hopiri,
Kei whetau,
Torotika,
E tu te maota,
Tahuna mai ra, ki te ahi a Tane, ra
Ko tunutunu whenua,
Ko anaana whenua, e
Tahi tama mate, ki te umu o te whao,
Werohia te tao a Tangaroa, e
Tahe ana ana toto.
He umutao a wahi e,
He umu tao takaripa, ki te tua.
Haere ana
Ka riri hoki au e
Ki a Tanemahuta i te wao;
Kei te kotikoti au, e
Nga uaua o Papatuanuku,
Nga taero a Kupe e;
Nga rori o te whare o Uenuku.
Kia mate ki te whanako e,
Ko Ngaehe, raua ko Kore,
Ko Ringaroa, ko Maka e,
Ko Whiro, ko Tamatekapua,
To raua uri, ko Houmaitawhiti e,
Ko Tia, ko Ririwai,
Nana te whanako, i Kaihinu ra e,
Ka whakatupetia,
Rare noa, i te pari ki Otutauira e,
Whatiwhati ana iwi.