page 112

KO TE TANGI MO HIHI, NA TONA WAHINE.

Tera nga tai,
E aki ki te rae,
O Mangauika ra;
He tohu aitua,
No te tau kua riro;
’Me kowai te Atua,
Nana i kawhaki,
Hihi, ki te mate?
E iri noa mai ra,
I runga te whatarangi,
E tama, whakaaro kore
Kei o teina,
’Hai tawhitawhi,
Ka hoki whakamuri;
Taria, e tuku atu,
Te whana kai-tangata,
Ma te rahi a ’Ti Apa,
Ma Hou-a-Uru,
Mana e whakaruku,
Ko te riri a te po;
Tena ka paea
Ki Wairoto, ra ia;
Ma Ngati-Koroki,
Mana e homai,
Kia kite iho au,
O hua whakairo,
O whanakenake,
I patupatua iho;
I werohia pea,
Ki te ake rautangi;
Ehara i te tane,
He huia tu rae;

page 113

He toroa whakakopa,
No runga o nga hiwi;
Ka paku ki tawhiti
Te pu, ki Tararua,
Ka hoki mai e te tau,
Te moenga i a au:
Taku manu korero,
Tiu ana ki te muri.