Other formats

    TEI XML file   ePub eBook file  

Connect

    mail icontwitter iconBlogspot iconrss icon

Ko Nga Moteatea, Me Nga Hakirara O Nga Maori

KO TE TANGI, MO WERAWERA NA, KO WERAWERA, TE MATUA O TE RAUPARAHA RAUA KO WAITOHI, KO WAITOHI TE WHAEA O TE RANGIHAEATA

KO TE TANGI, MO WERAWERA NA, KO WERAWERA, TE MATUA O TE RAUPARAHA RAUA KO WAITOHI, KO WAITOHI TE WHAEA O TE RANGIHAEATA.

Tu taratahi ana, te whetu o te rangi;
Te tangata toiora, e kore e ngahoro ki raro ra,
Nau i taumau i te rangi e tu nei,
Mate mai ano, i a Maui-hangarau,
I mate ake ano, i a Maui-kakata, e,
Te ahunga oneone,
Te aponga ki runga ra
Ka rewa o toto ki te rangi;
Romia i te tangata,
Kia ngaro ki te hau, o te kore noa iho;
Whakaora mai e,
Te marama i te pae.
Ko wai te atua, i whiua ai koe ?
Ko Kimai-te-rau, e
Na te tangata, to kete kai
I wharikia iho ai,
Taku kiri kowhiti, e,
Ka pau te moumou,
Nga kohatu makauri,
I raro Waihinau;

page 128

Ka whatiwhati koa,
Nga parirau o Kupe,
Ka punia mai ano,
Nga wai herehere taniwha
Roto o Marokopa,
Mana e rangaranga,
Nga mate o nga iwi nei, e
Ka tiraha ki runga, e;
E Poho ma, e
Whakarongo mai ra,
He paka whatianga,
Ki waenga te tahora,
Kihai i tuku turi,
Kia tangohia atu,
I te mata o te tao roa;
Nawai tenei, e
Me hori noa koe i runga te makatea;
Te hau i karangatia,
Ki a Tu-te-nganahau, e
Haea mai ra
Ki te mira tuatini,
Kia rere ko te kora,
Ki runga te rarauhe,
He kai tuhanga rau,
Kia rato nga waka;
E hara taku manu,
I te manu karetai,
I te wao totara,
E hoea atu nei
Ki roto o Rimupiko
Koia Tukapohia
Mana e koko
Ko te ika a Ngahue,
Haupatua iho,
Ki te patu pounamu,
He kaka tino tangata,
Ka moe ki te hau.