page 147

HE WAIATA.

Ao mauru, e tauhere mai ra,
Na runga ana mai te hiwi kei te Tawake,
Katahi te aroha, ka makuru i ahau,
Ki a Pomare ra, i rangia i te itinga.
Pirangi noa ake, ki te kimi moutere,
Kia utaina au, te ihu o te Rewarewa,
Te waka o Patutahi; hei whiu ki tawhiti.
Kia koparetia, te rerenga i Raukawa,
Kia huna iho, kei kitea Ngawhatu,
Kia hipa ki muri ra, ka titiro kau atu.
Kia noho taku iti, te koko ki te Whanganui,
Nga mahi a Kupe, i topetopea iho.
Kei whea te tane, i aroha ai i te itinga,
Mo nga riri, ka rukea ki ahau;
Waiho i roto nei, ka nui te ngakau.