page 162

He Tangi Na Te Riutoto, Mo Te Hiakai.

Tera te haeata, hapai ana mai,
Me he mea ko te tau,
Tenei ka ora mai;
E Hia’ rongo nui,
Ki te taha o te rangi,
Ka whati ra e,
Te tara o te marama,
Taku ate hoki ra,
Taku piki Kotuku.

Tena te kakahi,
Ka tere ki te tonga,
I whiuwhiua koe,
Te hau ki a Tu.
Mei ona ahua,
Te hoki ki muri ra,
Kei whea to patu ?
E hoka i te rangi,
Hei patu whakatipi
Ki mua ki te upoko.
Ki to kawe a riri.

Whakahaerea ra,
Kia rato nga iwi
Kia kite Taupo,
Kia kite Rotorua.
Kia werohia koe,
Ki te manu kai miro,
I runga ao Titi,
Hoki mai e Pa,
Ki te waka ka tukoki;

Waiho ki muri nei,
Ka ru te whenua,
Ka timu nga tai,
I roto Waikato.
Taku koara,
Te uira i te rangi,
Whakahoki rua ana,
Na runga o Hakari,
Ko te tohu o te mate na, i.