page 243

HE WAIATA, WHAKAMOHIO, NA TE HEUHEU.

Te makitaunu noa ana, te tangata ki te korero;
Kia huaina, e-i!
E kore koa nge au, e hoki ki te iti,
Kei runga au o te wharawhara i a Nuku-a-Rangi,
Turakina ki te muri, kihai ’pikitia,
Tahu kau i te ahi ki te tumu;
Kihai rawe kupu, mo te kaitoki,
Hei taroi atu i e ihu, i tu ai tama;
Ki te hiahia ki te koronga;
Me ko Tanetapu,
Me ko Tuaranganuku;
Ki te putiki, tauwhiro ai,
Whakarongorongo ana, te taringa;
Ki te haumi a te taurua e kuku nei,
Kauaka, koe ko to teina, ko Te Ipuraho,
He taringa, ka huhuri, ki te kanohi;
Ki te ahi purakau,
Me tuku korua kia manu ki waho,
Tenei aku punarua ki taku tauranga,
I tikina koa kia Ruatehuhuri;
I katoa mai ai, te mahara,
He tangi waka koa, kei eketia,
Tenei to waka, ko tuwhanua,
Tuaia i te manga o Waio;
Ka hinga kei te whenua,
I te tuai o te waka, i eke mai ai, ko Tawhiarangitata,
Ka puta koe, ki te whaiao;
Ki te aomarama,
I rawe tahi ano i te kupu;
Koia te pupuke,
Waiho te matamata, mo Tukino;
E whai ana i te hikuhikutanga;
Ko te rau o Mahuta,
Koia tenei e tama,
He whakawhiwhinga, na to matua,
Koia i rawe ai, te whaihanga na, i!