Other formats

    TEI XML file   ePub eBook file  

Connect

    mail icontwitter iconBlogspot iconrss icon

Ko Nga Moteatea, Me Nga Hakirara O Nga Maori

HE PATERE, NA TE PIKI.*

page 283

HE PATERE, NA TE PIKI.*

Ka turamarama ra e te hinangaro,
Ka whekite, ka whekaro,
Ka whakatarakupenga ra e te ngakau,
Ko nga whakaaro, tenei ka tata mai,
He ngihanga taraiti,
Ka kitea atu nga kokonga o te whare,
Ka marama nui,
He whetu ao tenei ka tata mai,
Ko te rite ra i taku tinana,
Aha, ha, ha.

E whae Tutari e,
Matua kapea te pura i,
To kanohi,
Tikarohia,
Ka maka kei te whenua,
No namata mai ano te pura i to kanohi,
Pura tonu,
Pura tonu iho,
Kei to keke te hokinga mai o to he,
I te kumu pitakataka,
I te urunga te tau ki te whenua,
I te papa teretere, i te wheke tere mai kei te moana,
He rurerurenga,
He panapananga,
Tupuna patua ki runga ki te tahuna pipi,
Kei hane koe.

Kia atawhakaaro marire iho e te ngakau,
Ki tou pa horo kei te Arawi,
Ko Pangopango te kai tutai i te taua i te po,
Ko Te Kawe, nana i tukutuku te taura i te pari,
Me he punga waka,

page 284

Te tatutanga ki te whenua,
Ka mania, ka paheke,
Ka takahurihuri koe i te pari ki Tapirimoko,
Takahia atu i te tua one ki Hukarere,
Ko te Rangituatea te rangatira,
Nukunuku atu, nekeneke atu,
Ka peka ra ki tahaki,
Ka tika a Te ’Raha i te au maro,
Ki te ’Ati Awa,
Ka rohea putia i waenganui,
E Ngati-Tumarouru,
E Ngati-Kinohaku,
E Ngati-Waiora,
E Ngati-Apakura,
E Ngati-Urunumia,
E Ngati-Maniapoto,
Ka mau koe i te herehere,
I whakahokia mai i Ngati-Mutunga,
Te tikinga mai i a koe,
Me utu a Te Aka ki te aha?
Ki te pounamu,
Ko te Awaikamoana,
To moho, e Aka, na.

Nau ano i ako mai te whakaheke,
Awhiotia i te nuku o te whenua,
Ka tae kei a Kapiti,
Tirohia e koe, te maunga tiketike kei Tararua,
Ka rau Omere kei waho,
He maunga tutainga aio,
Rerenga waka ki Raukawa,
Kei Arahura,
Ko te wai pounamu ra tenei ko Arahura,
Kei Poutini,
Ka tu nga whata kai a Tamairangi ki Porirua.

page 285

Aue kapa te hoia,
Kapa te tewara,
Kapa te maori,
Ka rohea Tutari ki waenganui o tona pa,
Umeretia i te takiritanga o te ata,
Utaina atu ki te Tima o Kawana,
Kawea ki tai ki te moana,
Ki te huti hapuku,
Ki te huti ururoa,
Ki te huti warehou,
Hei kai ma Kararaina.

Te kati ake i a Te Kawana
Tikina mai ana e Potatau,
Mauria atu ki tana ringa
Kawea ki Waikato,
Kia kite mai a Te Pakaru,
Kia kite mai a Taonui,
Hei whakapepeha ma rau o te iwi,
Kia tangi te piopio,
Piopio,
Piopio,
To moho e Kararaina, na.