page 289

HE WAIATA.

Kaore taku raru,
E rau tahuritanga ki te whare,
I whakawarea au e hika,
Ki te tama i ara, na Te Puwhakahoro,
Hua noa ki te hanga e nunumi nei kei te aha,
Kaore, kei te whakarato ki waenga te tahora,
Te ara o korua ngakau ki nga mahi, a Rua-te-pupuke,
A Rua-te-hotahota,
E heke ana ano, i nga heketanga o Maro,
Piri ana i ara,
Me he paua whare,
Piri ki te tupari maunga,
Tini whetu ki runga i te rangi,
Ka whakahinga noa koe,
I a Tane mahuta,
Ki nga uru kiokio,
Ki nga paripari ki Otuwhaia,
Rere pu o korua mauri,
Te tika i te ara,
Tapeka noa i te whenua,
Apiti rawa atu ki te takotoranga o Haumia,
Ki te aka o te whenua,
Totoro to ringaringa,
Hei waewae;
Totoro to waewae,
Hei ringaringa,
Ka takoto te ika whenua o te rangi,
Ka tahi ka auraki mai,
Ki te whanau,
A te mangumangu kikino,
I te aitanga a Punga i a au e.