Other formats

    TEI XML file   ePub eBook file  

Connect

    mail icontwitter iconBlogspot iconrss icon

Ko Nga Moteatea, Me Nga Hakirara O Nga Maori

HE HAKA, NA HOKI

page 297

HE HAKA, NA HOKI.

Te whakama i a au e,
Me he iwi ora te kai kino nei te mamae,
Ki te rongo kino e hau mai nei,
I tuakaihau te korero,
E te patata mai,
Ka hei koia taku ngakau,
I ngaki mowhiti ai,
Ki taku whakaaro,
Ko te pou huinga mataho nui o te whenua,
Ki te karanga i nga iwi,
Ki te ahu taua teretere kei Horotiu,
Kia kakahu i te kahu whakairo,
He neketaha,
Ki te pakipaki he korohunga,
Ki te nohoanga o te Toiha,
Nukunuku Toheroa ki tahaki,
Te nohoanga o tumu, te nohoanga o he,
Te nohoanga o te Whirowhiro,
Ka tau ano rapea e tama,
Ka waiho te haere,
Hei haere.
Pae mai te taonga ki te whare,
Hokia te tuarua,
He ara kai hokohoko,
Kihai koe i whakaaro,
Ki a Waitaoro,
I nohoia na te puaha Okoro,
Kihai taka mai he taonga,
Maui hangahangarau,
I hia ai Haha-te-whenua,
Ka eke Hawaikiroa ki uta,
Hika-te-pipiro,
I takina mai ai Ruaea ki uta nei,
Hei kati mo te tangata,

page 298

He manga te ika i houa ai,
Te takere o Tainui,
E hara rapea e tama i konei,
No rawahi mai ano,
No nga mangainga i a Tamatekapua,
Whiro te tupua,
He tupua Ngapuhi,
He tupua Hauraki,
He tupua Rotorua,
He tupua ’Kahungunu,
He tupua Waikato,
He tupua Taranaki,
Kaore e tama hei iwi i ngaro te tupua,
Purua i tore o Pihanga,
Tuwhera te Whanganuiatara,
Te rongo te whauwhia,
Kia mau,
Ki te rourou iti a Haere,
Kakariki i tunua,
Kakariki i otaina,
E tama e,
Kei te huna koe i to atua,
I a Tuwhakaparuate,
Te whakina ai, kia kite mata o tangata,
Kei hau kau o rongo tupua,
Ki taha patu o te rangi,
’Ku hono nei ka riariaki,
’Ku hono nei ka hapahapai,
’Ku hono nei ka ranga taua,
He taua,
Kia pikihaha,
E Hine-te-iwaiwa, ki te mangai o te whare,
I a Tonga, ko Papatuanuku,
Ko te Taiariki,
Ko Uekoko te ara i a Henga ko Te Tatauotepo,

page 299

Ko te hiwi ra o aku tupuna,
Nana i whakahua te makutu,
E toai nei i te ngutu o te tangata,
E hara koe i te uri o Korokino,
E taroi ra i tawhiti ki a Hori,
Ki te pu ra o te atua,
Ki te pakeha he kaipuke,
Nana i whakahua te pu ki uta nei,
Ki te tuatangata ki a Mariaikena,
He taonga noa,
I te weruweru pokaia ki te ringa,
Ka paraharaha te one i Kukuriki,
I te whainga i te matau hapuku,
Ki te kahu atua kahu whero,
Ki te pu ra i a Te Uira,
E kawea ana e te ngakau,
Ki te uri ra o Komako,
Ki te huanga kerekere ko Kaihau,
I tuhia mai ki te nui maka rapa,
A te kanohi, ka whekite, ka whekaro,
O ringaringa e Te Wehi ki te kai kapo,
Mai te kutikuti, naihi kopikopi,
Ripa mai o te puke o Matakitaki,
Ki Hauraki;
Ko te kai whakahoki o Pahungatoroa,
Ki te tonga;
Ka hoki te rongo toa o Kukutai.
Ka haere te uri o kai-whiro-whenako ki nga whenua,
A hei hakatea noa ai ara,
Ma Ngati-te-Ata ki te menenga ope ki Puketutu,
Kia whakarongo mai e Ngai Pukenga,
Ko Ngati Paoa he hikihiki hoenga taua ki Ngapuhi,
Ma Tangiteruru ma Te Rauroha,
Ka tukutuku ki te ia ki Ohi,
Hei a Hongihika,
Kia whakapongatia, mai he tupua.