page 330

KO TE TANGI, A KARANGA, MO WHAKATERE.

Takina mai ra,
Nga huihui o Matariki,
Puanga,
Tautoru,
Ka ngaro Atutahi,
Mana e whakarewa,
Te tini whetu riki,
Ka rewa kei runga,
Puhia e te hau,
Ki runga o Pukekahu,
Ka ngaro ia i te rehu tai,
Tena e te iwi,
Taku kura-tangi-whakaingoingo,
Te whakaangi atu na,
Waiho kia haere,
He toroa awe nui,
E kopa ana ia ki te muri,
I hukia mai ra,
Taku hou kotuku,
No runga rawa ia,
No te pae tauarai ki Poutini,
He Kuru-tonga-rerewa,
Ka tahi ka unuhia,
I roto i te whare o Paekawa,
I tirohia ano,
Ka hoki te uira ki runga o Tongariro,
Ko tou tini ra,
Te taka mai ra i te mania,
Ki Okahukura ra,
Ko te matamata i torona atu,
Mo koutou ko potiki e moe mai na,
E—’Tere.