Other formats

    TEI XML file   ePub eBook file  

Connect

    mail icontwitter iconBlogspot iconrss icon

Ko Nga Moteatea, Me Nga Hakirara O Nga Maori

HE TANGI, MO HAURAKI, I MATE KI WAIKARE

page 337

HE TANGI, MO HAURAKI, I MATE KI WAIKARE.

Tera te Kaiwaka,
Ka tu ki te uru,
Taku koara,
Te uira i te rangi,
E kakai rua ana,
Na runga o nga puke,
Ko te tohu o te mate na i,
To ana te marino,
I roto o Hokianga,
He tai au noa,
Te tai ki Onoke,
Unuhia atu ra,
Te puru o Ramaroa,
Waiho ki muri nei,
Ka ru te whenua,
Ka timu nga tai,
I roto Whirinaki,
Karekare kau ana,
Nga tai o te awa,
Tu noa te puia,
I runga o Kahia,
Ka ngaro hoki ra,
Taku hoehoe waka,
Taku waka rere hau,
Ki roto te Kohukohu,
Kia tirohia koe,
E te iwi tere tai,
Wahia putia,
Te tara o te marama,
Taku manu tataki,
Ki te tai Tokerau,
Haere ra e Hau,
Nga tohe maro,

page 338

Haere ra e Rua,
Nga riri kahaki,
Kaore ianei,
Ko koe kia kamea,
Hei mutunga ika,
Ki roto o Waikare !
Kei whea hoki ra,
A Tawhai e rangona,
Kaore ranei !
He tahuri waka nui,
Koe riri whatiwhati,
I to matua ra,
Kia utaina koe,
Ki te ihu o te waka,
Kia whakarukuhia,
Te moana pouri,
Ka kitea i reira,
To kiri marama,
To mata whakarewa,
Ki te wai ngarahu,
He paenga koputu,
Ka pae ki Korora',
He paenga paraoa,
Ki runga te Kaipuke,
Kia whakarongo koe,
Te reo o te tupua,
Kia whakamau koe,
Te kara o Maiki,
Ko te take tena i.

Hoki mate mai ana,
Ko te hoa i au,
Mei a waiho koe,
I runga Okaihau,
Koe riri tungutu,
Kei o matua,

page 339

Kia tirohia koe,
E te tini o te hoa,
Ki’ wharikia koe,
Ki te ngutu o te pu,
Kia tau te wheoro,
Ki roto Omapere,
Kia tangi te ngongoro,
Ki runga te Ahuahu,
E tika ana ia,
He hinganga rangatira,
I te nui a Ti Maru na i.

Ma wai e ranga,
To mate i te ao,
Ma kore noa iho,
I muri i a koe,
Ma Te Waka ra,
Mana e rangahau,
Kia ea ake ai,
Taku mate whakarere,
E kore koe e ora,
Me kai e au,
Pokai i te tonga,
Nana i timata,
Nga riri ki te iwi.

Ka pa e tama,
Ka kora ake i te pae,
Tikina takahia,
Te puke i Tarahi,
Kia ea ake ai,
Nga mate e takoto,
Moe ana ko te hoa i.