HE TANGI, NA PAPAHIA, MO TE HUHU.

Tera te whetu,
Me ko Rereahiahi,
E torengi atu ana,
Te pae ki a tirau,
Pai aha ra i au,
I te ipo ka riro,
E ngia i a koe,
Ko taku taonga nui,
E hine kai tu,

page 390

E hine kai rere,
E hine kai kapo,
Te ranga awatea,
I te hihi o te ra,
Koe ti ka ngaehe,
Roto Awapoka,
O takanga tonu,
Ra pea koe,
He numinga,
He kopanga,
Kaore ka tuwhera,
Te ngakau haere-i,
Whitikia to kahu,
I te ata ka whanake,
Kia tuku atu ana,
Nga tira o te haere,
Raro te whenua,
Ka kitea ki runga ra,
Kia tangohia mai,
Koe kura a Maui,
Nga mahi e pupuke,
I o huaanga ra ia,
Me ko hine na Rau,
Mana e rere atu,
Rukuhia iho ra,
Koe kuku moe toka,
Koe ika moe rimu,
Kia piua iho,
He kai ruru mai,
I te tini o te iwi,
I te puni wahine,
I te nui a Ti Koro, na i,
Kei ’hea hoki ra,
Nga tai o te uru,
Ka ngaro hoki ra,
Taku toka taipari,

page 391

Taku toka taitimu,
E tu i waho ra,
Turanga hoa,
I te one taitapa,
Whakaputaina ra,
Koe waka tipi-hau,
Kia rokohanga atu,
Te au e mahora,
E kau i reira,
He moana waiwai,
Rarangi noa ra,
Te rangai kuaka.
Kia tauhikohiko,
He pari tu waho,
I herea iho koe,
Hei makau rawa atu,
I tapu i te aha.
To uru whatiwhati?
Te ho mai ai,
Hei mihinga ake,
Mo hine i te ao e-i;
Tera te uira,
Ka hiko ki te rangi,
E kakai rua ana,
Na runga o Tauwhare,
Kaore ianei,
Ko te tohu o te mate,
Unuhia noatia,
Te ata o Wharo!
Te whakaaro koe,
Ka nui o hara,
Takiri whakarere,
Te patu i to ringa,
Rongomai-hara-nui,
Uenuku-wareware,
E ui ana au,

page 392

Kei ’hea te marama,
He Tangaroa-a-mua.
He Pau-te-korekore,
Ka rumaki atu koe,
Ki te tua o Raukawa,
Ka rere whakawahine,
Te tonga o te ra!
E tangi haere ana,
Nga tai o te uru,
Te Papa-o-whare-ana,
To haerenga,
Tahutahu kau ana,
Nga puke o te tonga,
Ka hutia te tohunga,
Ki runga ki a Rona,
Ka whakairia nei, e,
Uakina ake ra,
Te tatau o te rangi!
Ki a piki ake koe,
I te rangi tuatahi,
Te rangi tuarua,
E tae ki raro ra,
E uia mai koe,
“Ko te aha tenei ?”
Ko te pakipaki o te ao,
Ka maunu mai nei,
Ko te taroi o te riri, e—
Ko te tai ko te ata,
I mahue iho nei.
Whakaparirautia,
Te whetu i te rangi,
Atutahi-Marehua, e—
E hara e te hoa,
He utanga kupu au,
Na rau o iwi,
Na rau o tangata,

page 393

Ka ngaro nga iwi,
Ka ru te whenua, e,
Ka poua taua,
Nga pou tu noa,
I roto Waimako,
Ka tokia to kiri,
E te tomai-whenua,
I roto o Hokianga,
Ka timu nga tai,
Ka mokaia hoki, e,
E titiro ana au,
Te puia tu noa,
I runga o nga hiwi,
Tineia kia mate,
Kei tae hoki ake,
He mahara ma roto,
Ki te kino ra ia,
Ka tau-wehea nei, e-i.