KO TE PATERE, A HINE-I-TURAMA, MO TE KORERO TEKATANGA, A TE ARA, KUA HAPU IA I TONA PUHINGA AI.

E noho ana, i toku taumata i Tiheia;
E papaki kau ana te paihau o te manu,
Mei tata mai, ki taku taha,
E peia ake, te tinana, i raro.

Kia riro mai taku ipu whakairo, ko Te Heuheu;
E tatangi kau ake nei, te korokoro
Ki te hokowhitu, a Ngati Waipare.
I whakatapua, ki te aha, te Hautapa,
Tika ko au ’nake, kai nei, te roro o Takeke;
Kai atu,
Whakairi atu, ki te pataka;
Kai atu Pateko,
Ko te kai ra, i koroa atu, e te ngakau, ko Tukino.

page 87

Kia utaina ki te tiwai, e rere ai ki tawhiti,
Kia ui tauhou au, ki Whakaari,
Kei te puke tapu ki Paepae-Aotea;
Kia taroia te moana, e aku paki, Whangara ko Matioro.
Kati hoki te whakaupa, ki te noho,
Ka toi au ki Hawaiki,
Ki te kai ra, i rari noa mai, te raweketia e te ringaringa
Me whakatangi te korowhiti, ki Tauritoatoa, ki a Te Ngahue,
Ki Matakawa, hei a Pori-o-te-rangi;
Ko te au ra, i nohoia e te takupu, ko te Whaiapawa:
Kia ope noa te kutukutu,
Kia ope noa te whakairoiro,
Hei ngari mo maua, ko taku tamaiti poriro;
Mo tuwairua,
Mo paki kau noa atu, e te ngutu o te tangata.
Nau mai hoki ra ae, e te iwi kia kite koe i te wharewhana-
unga-tamariki.
Ka whakaarorangi tenei ki Tikirau, ki a Te Putahou,
E nonoi atu ana ki te Kahamakaurau, ki a Te Hoatiki,
Kia pehia mai taku tua, ki te kape-Rawhiti.
Mikiha.
Makora te matarae, ki Whangaparaoa, ko Te Wewehi-o-te-
rangi,
E aki kau ana, te tai ki Ahuriri,
Ko te rawa hoki, e Whata, i whakaihia ai toku kiri.
Mei tutakina e namata, kia karapipiti;
Ako rawa ake ki te mahi a te tui,
Kei te ngutu koikoiareke, kei tahora;
Mokai taku whaea i riro atu na,
I waiho ai, hei hikihiki taua, ki te ihu o Paua-nui-a-te-
haupu-pararaki,
To peha taua, e Te ’Kiri-Rarauhe, ki te rangi,
Ka too poriro au.

Moe atu ana aku kanohi, ki a Tukorehu;
Ki te hunga nana i takitaki taku mate, ka ea.

page 88

Waipoua, kati ra te whakakeke noa, i te pakanga;
Uatakitia, te hapai o Taetae-o-Maui;
Kia tipoa, te tihi ki Tongariro ki a Matotoru,
E rua aku ringa, ki te here mai, i te aitanga
A Tuwharetoa, hei kai e.

I au ra e Weu ma, i te pani-taua, e takoto nei te mamae,
me he ngau-atua.
E tatari noa atu ana, ki a Te Ware-Aorere,
Ma Taratuahu, e ranga mai te muri raro,
Me whakatakoto ki te ngaro tangata, ki Hauraki ki a Tu-
te-rangi-a-nini;

Hei arataki, ki te rerenga wairua, ki a Miru, ki a Te Hotete,
Kia pehia mai te kuri-awa-rua,
Mo te makariri e totope nei te hukarere,
Nga taritari o Matariki;
Te anga atu, ki Tokerau,
Ki te hunga, kai i a koe,
Kei te mate hau kore noa, te nui ware,
Ka whanatu au, ka tipi ki Taranaki, ki a Te Haukopa.
He koro, ka tutuki, ki te Moana-Pounamu ki a Pairo,
Ka pai ano au, ki te tihotihoi,
Ki te makihoi,
Ka te pakitua, i aku ringa,
Ka te whakaihi, ki te hihi o te ra;
E whatu koutou, e Horo ma, i te kahu, o te ao-marama,
Kia whakatihake au, i te roa o te whenua,
Hei paki-waitara kau atu,
E kokoia, e Ara, e-e.