Other formats

    TEI XML file   ePub eBook file  

Connect

    mail icontwitter iconBlogspot iconrss icon

Ko Nga Moteatea, Me Nga Hakirara O Nga Maori

He Pana

page cxi

He Pana.

Kia pai koia te tito o te waiata,
Kia paparonaki,
Kia whakarongo atu maua nei ko aku taringa,
Ka pai nei ra ti,
Na wai koia te putea i mahue noa i te
Ihu o te waka o Nga-Puhi,
Ko te Totara ka paea noatia
Ki te awa ki Waihou,
Ka tanuku nei to pari kawau
Ko Ngatukituki-o-Hikawera,
Whakaarohia e koe ki te kumi a Tawhao e
Takoto mai nei,
E huhuka kau ana nga rimu o te paripari,
E ngahue kau ana nga koura o Whitianga
Titiro koia to kanohi ki Moehau maunga e tu noa mai ra,
I te akinga a te hautonga,
Ka whakataretare te kanohi ki roto Hauraki,
Kei whea te momo te tangata, ka ngaro nei e?
Ka memene koe ki Waikato,
Ka mahue nei Manawaru,
Hei whakamaunga rahi maku, ki te whana,
E kai iho na koe i runga i a Ngaehe,
Ka pau te ho atu ko te papaangaanga tou papa,
Kia kai iho koe, kia kai mai to wahine,
Ka mate koe i te whakama, i a Wakapikoi patua noatia,
I a Pataua e tuohu noa i te takiwa,
I a Te Arakai e moe ko tahi mai te whana ki Taupo,
Whakairihia to putiki mohimohi, ka whakamara,
Hei whaomoomo mo tamariki e-i,
Te mahara ai koe, ko Te Ngaehe,

page cxii

I kainga noatia i te puta i a Te Kaharunga,
Ko Maniapoto tena ko te hiku o te ika,
Ko Horotiu tena ko te pane o te pakanga,
Ko Muriwhenua ki Waikato,
Ko Ruamoana ki roto Tauranga,
He huihuinga nga korero ki te Ranga-a-Kuri,
Ka tu nei te tikitiki ko Te Wharepakatau, e,
Te whakamutunga ko Tukoro e.

ka mutu.