page lxxvii

No. 5.
Ko nga Atua Maori.

Nga ika i te wai tai, i te wai maori. He atua anake mo nga tangata, nga mea ia i atuatia ai, ko nga hapu o te wahine i mate roto tonu mai, a whakatahetia ana tana tamaiti, whiua atu ki te wai, kainga mai e aua ika, a waiho tonu mai hei atua ngau tangata, wahine, tamariki. Ka hapu ano, ka mate roto, whakatahe tonu, whiua atu ki te whenua, kainga mai e nga mea o te whenua, e nga manu o te rangi, waiho tonu iho hei atua ngau tangata, wahine, tamariki, aha, aha noa atu.

Otira, he atua ano nga atua nunui o mua, no roto ano i te tutakinga o Rangi', raua ko Papa', i wahia i roto i nga tupuna nga ingoa. Ina hoki era nga ingoa.

Ko Maru, he atua, ko Rongomai, he atua, ko Itupawa, he atua, ko Hangaroa, he atua, ko Ihungaru, he atua, ko te Iho-o-te-rangi, he atua.

Ko nga atua enei i haere mai i tawahi i Hawaiki, na enei i ahuahu nga hapu whakatahe o nga wahine o tawahi, me nga wahine o tenei taha. Mei kore he atua nui o namata, e kore e whai atua ririki nga maori.

Ko nga ara whakatara, he harakeke, no te tatuatanga e taua wahine, waiho tonu iho hei ara whakataki, ina mate te tupapaku, ka whakatakototia te ara, ki runga i taua mahaki, ka karakia atu ai te tohunga, ina ka rongo te atua ngau, ki te rawa tika ia i kitea e nga matakite.

Ki to rawa ngaro, e kore e ora, ko te tarutaru ano tetehi, ara no te marohanga e te wahine he raupo, he toetoe, he kutakuta, he raurekau, he aha, he aha nga ara o te atua.