page lxxviii

No. 6.
Take o te Tapu Tane.

I tapu ai nga tane, i waiho nga wahine hei mea noa, hei waha kai, hei mea katoa i nga mea o muri, ara hei mea kai, he tohi ano mo te tane, he tohi ano mo te wahine, he whakatuputupu ano to te tane, he whakatuputupu ano to te wahine, he karakia purenga ano, to te wahine, he karakia purenga ano, to te tane.

No reira i nui ake ai te tapu o nga tane, i nga wahine, i ahu ano to nga tane ki nga mea o te rangi, ki nga mano i reira, ki nga tini i runga, ki a Tawhiri-matea, ki nga mano i raro, ki nga tini i raro, ki nga mano i Hawaiki, ki nga tini i Hawaiki, na reira te take o to te tane tapu.

Ko to te wahine tapu, he mea wahi nga mea o te rangi, mo nga wahine, he mea wahi nga mea o raro, mo nga wahine, he mea wahi nga mea o Hawaiki, mo te wahine, nga mea ki a Hine-te-iwaiwa, na reira te take o te wahine tapu, o te wahine i iti iho ai.

Kaore hoki nga tupuna o te rangi i poto ki nga whakatuputupu mo to wahine, kaore hoki nga mea o te whenua i poto hei whakatupu i nga mea mo nga wahine, kaore hoki nga mea o Hawaiki i poto hei whakatuputupu mo te wahine, tena mo nga tane, i poto katoa nga mea iti, nga mea nunui, mo te whakatuputupuranga o nga tane, otira kaore i ata poto te korero mai nga tikanga tapu, nga tikanga noa, he mea kaiponu mai e nga tohunga maori.