Ko nga kupu enei i whakapuakina nuitia kia te Petatone i te 5 o Aperira. Ko nga kupu pupuru tenei a Ngatiraukawa mo Rangitikei. E koro e te Petatone kia ata whakarongo mai kia pai to mahi ki nga tangata i roto i tou Huparitenatitanga i hokona ano e Ngatiapa tenei whenua i mua purutia iho e Ngatiraukawa mau ake tukua atu ana ko tera taha o Rangitikei riro atu i a Kawana Kerei, ka rite te hiahia o Ngatiapa, ka takoto tonu te paenga ko te Awa o Rangitikei. Muri iho ka hokona e Ihakara a Manawatu whakaaetia ana e Ngatiraukawa tana hiahia ka riro atu a Manawatu i a Kawana Paraone whakatakotoria ana te rohe ko Kaiiwi rere tonu ki Omarupapako rere tonu ki Pakingahau ka mutu i reira he rohe tuturu tenei. Muri iho ka hokona ano e te Hirawanu a runga o Manawatu whakaaetia ana e Ngatiraukawa ka riro a reira i a Kawana Kerei i tona hokinga tuarua mai ki Niu Tireni ka rite to te Hirawanu hiahia whakatakotoria ana te Rohe ko Mangawharawhara, te Rotopiko, Paripuwha i runga o Oroua ka mutu he rohe tuturu tenei. Ko tenei whenua e hokona nei e koe e kore e tukua atu e matou, kia hokona e koe kore rawa hei oranga mo matou a konei me ata ekaeka marire ma matou ano e utu te Pakeha, mana te Kapehu e hapai ko matou ano hei hoa mona. Kore rawa i utua e Petatone enei korero a matou.

I te 12 o Aperira ka tu ano matou (Ngatiraukawa) ki te aroaro, o te Petatone, whakapuaki ai i nga kupu nunui rawa.

E koro, e te Petatone, kauaka koe e hoko pokanoa i to matou whenua, kei he koe, me he mea, he raru raru kei to matou whenua, me waiho ki a takato pai ana ma te Kooti Whakawa e mahi, kia pai ai te mutunga iho, no te mea kua rite te Kooti Whakawa mo nga whenua Maori, kauaka e hutia kohamotia e koe, kei hinga kino he mate te tukunga iho. E kore ano hoki to matou whenua e makere kia hokona e koe, kore rawa atu, kaore he mahi i oti i te kino, kia rite ano i nga tangata e noho ana i runga i taua whenua katahi ka oti.

Ka utua mai e Petatone, e 800 rau o Whanganui, e 200 rau o Ngatiapa, kotahi 100, o Rangitane, o Muaupoka, ko nga Iwi enei, i haere tahi matou, ki te Whawhai ki nga iwi kino, kua whakaae nei ratou ki a hokona, kua riro mai i au tena whenua, maku e hoatu te moni ki a ratou.

Ka utua e Ngatiraukawa. Ka purutia e matou o matou whenua ake, ekore matou e tango i to moni.

I te 16 o Aperira, ka puaki ano a matou kupu kia a Petatone.

Whakarongo mai e Petatone, kauaka e homai o moni ki nga kai hoko whenua engari ekaekaia te whenua kia kite koe i te whenua o ena tangata e hoko na, katahi to mahi ka tika. Kei hoatu kau o moni i te tuatahi ki te kai hoko whenua, muri iho ka haere koe ki te to i to tini, ki runga i o matou whenua, ekore to tini e tau, ka pana haeretia, riri kau noa iho koe te Pakeha, no te mea ka tango Maori koe i to matou whenua; Purutia atu o moni kei waiho hei whakatupu kino a ka raru nga tangata o konei i a koe.