Ki te Runanga Nui o Niu Tireni, Kei Poneke.

Tena Koutou,—

He enoi tenei na matou nga tangata o Wairarapa ki te Runanga Nui o Niu Tireni me manaaki ta matou inoi. Kua maha nga tau kua pahure o to matou hokonga i te whenua ki a te Kuini, ko nga koha i whakaaetia mai e te Kawanatanga kahore ano kia homai ki a matou, he maha a matou tono ki te Kawanatanga kia whakaputaia mai aua koha; ko a matou pukapuka kahore e utua mai, ko a matou tono hurihia ketia ana, a heoi ano te ara e kitea ai e matou i naianei, he whakakite atu kia koutou i to matou mate kia tirohia arohatia mai e koutou, kia ata hurihuria aua he a te Kawanatanga. Ko nga Karauna Karaati kua whakaaetia ki a matou e te Kawanatanga i mua mo nga whenua whakahoki mai, ko etahi kua homai, ko etahi kahore ano kia homai. Ko nga Karauna Karaati hoki mo a matou whenua e whakawakia ana e te Kooti Whakawa Whenua Maori hoki kia hohoro ake te whakaputa mai, no te mea e utu aua matou i te wea, me era atu mea i runga i te tohutohunga o te Ture mo nga whenua Maori, kahore hoki e ahei i a matou te rihi; te hoko, te aha ranei i o matou whenua hei ora mo matou, kia puta maira ano nga Karauna Karaati: he ture pai taua ture ki te mea ka pai te whakahaere a te Kawanatanga: ka puta te ora mo te tangata, me te mutu hoki o nga raruraru o tenei motu i runga i nga whakahaere pai o taua ture, heoi, Kia aroha mai ki tenei inoi a matou, ata hurihuria, whakataua hoki te tika.