Title: Nga Korero Paramete: 1881-1885

Author: New Zealand Parliament, Legislative Council

Part of: He reo ture nō te taha Kāwana / Language of the Crown

Conditions of use

Share:

Teihana Kara Mo Nga Maori O Waipawa.

H. Tomoana.—E patai ana au ki te Kawanatanga, mehemea ka whakaae te Kawanatanga ki te hanga i tetahi teihana kara mo te kotahi rau rima te kau Maori e noho ana i Waipawa, e haere tonu ana aua Maori ma runga i taua reriwe, e tae ana pea ki te maero te matara atu o to ratou kainga i te teihana reriwe, a e haere atu ana ratou ma runga i te piriti o te reriwe, me te nui o to ratou wehi? Me whakaatu atu au, e tae atu ana ki te mano putu te roa o te piriti, a ko te papa e takoto ana hei ara mo nga Maori ki te teihana o te reriwe e ono inihi pea te whanui. I nga takiwa ua, waipuke hoki, e tae ana ano ki te rua wiki e noho mate ana nga Maori, i te kore e taea te kawe mai i nga kai i nga taonga hoki, i te teihana. Ko Waipawa hoki te kainga hei huihuinga mo nga Maori e haere mai ana i Wairarapa i Porangahau me etahi atu takiwa, na e haere katoa ana ratou ma runga i taua papa, e ka haere atu i te teihana ki te kainga Maori. Tera ano tetahi pakeha he koata maero pea te roa atu i te teihana, na kua hanga he teihana kara ki reira ma tona kotahi ko te nuinga o nga Maori o taua kainga e tae ana ki te rua rau, kaore i te iti iho i te tahi rau rima te kau, na he tawhiti rawa to ratou kainga i te teihana. E hiahia ana au kia whakaaetia mai tenei tono aku.

Te Honehana, tana kupu whakahoki, ka mahia taua piriti ki te paraki, kia kore ai e wehi wehi nga tangata e haere ana ma runga i taua piriti, ma tera mahi e kite ai te Mema rangatira na kua kore he take kia tu ai he teihana ki te wahi e kiia mai na.