Other formats

    TEI XML file   ePub eBook file  

Connect

    mail icontwitter iconBlogspot iconrss icon

Nga Korero Paramete: 1886-1890

Owhaoko Me Kaimanawa

Owhaoko Me Kaimanawa.

Timi Kara.—Ka patai ki te Minita mo te taha Maori. Nawai i whakahau i whiriwhiri ranei i nga korero mo te keihi mo Owhaoko kua perehitia kua tukua mai ki nga mema. Ko nga tauira o etahi o aua kupu e tino whakapae kino ana ki etahi tangata ra waho kaore nei e kaha ki te whakatete kia kore e tau enei kupu whakapae ki runga kia ratou. Mo runga mo te ahua o enei korero e mahara ana ia kaore pea i tika te whakahau a te Kaunihera kia perehitia, a natemea e whakapae tenei ki etahi tangata kei waho o te Whare e patai ana au kia kitea te tangata nana te whakahau me te take i perehitia ai Ki taku mahara koare e puta mai he painga mo te katoa i runga i tenei mea, a mehemea i tikina enei korero i runga i te tikanga mauahara, e tino pouri ana au mo tenei tu mahi.

Te Miterehana.—Ko aua korero whiriwhiri e pa ana ki Owhaoko he mea whakahau kia perehitea e te Kawanatanga kua mutu ake nei. I motinitia ki roto ki te Kaunihera kia whakatakotoria enei pukapuka ki runga ki te tepu, a i ahua awangawanga tenei Kawanatanga mehemea e tika ana kia homai enei mea, me homai ranei nga korero katoa e pa ana ki te whakawa tuarua o taua whenua. Otira kaore he paanga o tenei Kawanatanga ki taua mea, itemea hoki na te Kawanatanga tawhiti i whakahau kia perehitia aua pukapuka.

Timi Kara.—Ka whakaatu mai ki te Whare, kaore i perehitia nga korero katoa e pa ana ki tenei putake, whakarerea ana etahi wahi o nga korero e whakaora ana i te hunga e whakapaetia ana. I runga i te whakaaro tika me whakpuare he takiwa e rongona ai nga korero whakahoki a te hunga kua whakapaea nei.

Takuta Numana.—Whakaatu mai ana he maha nga pukapuka kua tuhia mai e Takuta Pura ki a ia, me te korero mai ai te nui o tana pouri mo enei korero whakapae teka, a ko te mea tika inaianei me hurihuri te Minita Maori i tenei take, kia perehitia katoatia aua korero, kaua tetahi wahi e mahue. Kua rongo ia kei te pouri rawa a Takuta Pura a tera pea ia e hoki mai i Ingarangi ki te kimi tikanga hei whiu mo te hunga kua whakapae teka mona.

Te Ropiha.—Ko te mea pai me whakaatu mai e te Minita Maori na tenei Kawanatanga na tera Kawanatanga ranei i whiriwhiri ko ewhea wahi o aua korero e perehitia, I tana kitenga i enei pukapuka ohorere ana tana mauri mo enei korero kino ngautuara mo tetahi tangata kei waho o te Koroni. Ko te mea tika ia kaua e whakapae teka ki nga tangata e ngaro ana, erangi me whakawatea he takiwa mo te tangata e whakapae ana mei kore karohia e ia tenei whakapae. Tana hiahia me perehi katoa ana korero, kaua e puritia tetahi wahi.

Te Miterehana.—Na te Taute i whakahau te Tari Maori kia tikina aua korero. Katahi ka tonoa a Tiati Make i Waipawa kia whiriwhiria kia tukua mai nga wahi o aua korero e pa ana ki te whakawa tuarua mo Owhaoke. Otira ka tahuri ia ki te rapurapu. a mehemea i mahue tetahi wahi o te korero, tera e perehitia.