Title: Nga Korero Paramete: 1886-1890

Author: New Zealand Parliament, Legislative Council

Part of: He reo ture nō te taha Kāwana / Language of the Crown

Conditions of use

Share:

Whakahoki Mo Nga Kupu A Te Mema Mo Kumara.

Hirini Taiwhanga.—E te Tumuaki e hiahia ana ahau ki te whakahoki kupu mo nga kupu a te mema mo Kumara mo matou (ara) mo ta matou tautokonga i te Kawanatanga. Ki taku whakaaro kahore he take e whakama ai matou ki te pera, no te mea kua whakaae te Kawanatanga ki te waiho i a matou mema kia pera ano te maha me nga mema o mua ake nei, no reira ka pooti matou ki te Kawanatanga. Na te iwi o toku wahi o te motu i tono mai i au ki konei hei whakahaere i nga take Maori kihai i haere mai ki te whakahaere i nga take a te mema mo Kumara erangi i pootitia mai matou tokowha hei whakahaere i nga take a nga Maori. E rua aku Pire kei konei hei whakahaere i nga take Maori a ki te ahei i te mema mo Kumara te mahi kia paahi hei Ture, ka kiia ia e ahau e tangata pai. Otira e mohio ana tatou e hiahia ana ia ki te tautoko tonu i ana whakaaro. Heoi ka ki ake ahau penei ano me taku ki o mua ahakoa ka homai he Ture pai e tenei Kawanatanga e tera ranei ka tautoko ano au i a ratou, kahore he tikanga ki au ko tewhea Kawanatanga ko tewhea Kawanatanga ranei. Heoi tonu ko te Kawanatanga e homai ana i nga Ture pai mo matou, na i te mea kua ki mai nei te Pirimia ka waiho tonu e ia a matou mema kia wha heoi ka pooti tonu matou ki aia.