Nga Maori O Tarawera.

Timi Kara.—E patai atu ana ahau ki te Minita Maori mehemea ka whiriwhiria nuitia e ratou tetahi tikanga hei tuku i tetahi whenua mo nga Maori o Tarawera me etahi atu wahi i rere mai nei i te huunga o Tarawera. Ko te take i whakanohia ai e ahau tenei patai ki runga i te Ota Pepa he mea kia ata tirohia e te Kawanatanga te mate o enei iwi I tae te maha o taua hunga ki te 150. A i runga i to ratou matenga ka haere ka noho i runga i tetahi whenua, akuanei ehara taua whenua i a ratou, a tera e taea te pei atu ratou no te mea he hunga ke nona te whenua. He nui te mate o taua hunga, a ko taku hiahia kia hokona ranei te whenua e nohia nei e ratou me hoatu ranei i tetahi atu, mehemea e hokona ana tenei e nohia nei e ratou ekore e neke atu i te £30 te £40 ranei te utu.

Te Miterehana.—Kei te tuku patai te Kawanatanga inaianei ki te ahua o aua Maori. He whenua nui o te Kawanatanga ki te Tai Rawhiti o Aotearoa, a kua kiia atu ki te Kaiwhakawa tuturu i te Takiwa o Tauranga kia haere atu kia kite i aua Maori, me te patai atu ki to ratou ahua. Kahore i puta te whakaaro o te Kawanatanga ki te hoko i tetahi whenua mo ratou no te mea he nui nga whenua o te Karauna kei taua takiwa a ka taea te hoatu i tetahi wahi o taua whenua (ara) ki te kitea kahore he whenua a tana hunga.