Kooti Whenua Maori Ki Whakatu.

Ko Parata.—E patai ana ki te Minita Maori mehemea ka tonoa e ia te Tumuaki kia whakaturia e Tiati Make he Kooti ki Whakatu hei whakawa i nga take Maori ki etahi rahui kei reira ana oti tana mahi ki Otaki. I tae mai he reta ki aia na nga Maori o Whakatu me Motueka e tono ana kia hohoro te whakaoti nga tikanga mo ana rahui. He pono te ki i tu ano he Kooti ki reira i tenei tau ano otiia kitea ana kaore i kaha te Kooti ki te whakahaere. Hui mai ana nga tini Maori ki reira, pau kau ana a ratou moni i te haerenga, a heoi te koha i puta ki a ratou ko te kupu a Tiati Tirimara kaore ia e kaha ki te whakawa i aua tono. Heoi ko tona tukunga iho ko te haerenga o nga Maori ki te Minita amuamu ai mo ta ratou moumou haere ki taua Kooti. Ko te he kihai i tukua ki nga Maori tetahi whakaatu kia kaua e haere atu ki taua Kooti i te mea e kore e whakaotia aua keehi.

Te Karimana.—Kei te nui nga keehi kei Whakatu a e tika ana kia tere te whakahaere otiia ko te mana o te Kooti kei te Tumuaki, a e kore e tika kia peke atu te Kawanatanga ki te tohu tohu ki aia, otiia i te mea kua puta te kupu a te honore mema ki te Whare tera ia e whakaatu atu ki te Tumuaki.