Turei, te 26 o Hune, 1894.

No te hawhe-paahi i te rua karaka ka noho te Tumuaki ki runga ki tona nohoanga.

Ka mutu te karakia.

Ka whakahaerea ko etahi mahi o te Whare Ka mutu era ko:—

Te Haihana Mo Te Whare.

Ko Ta Ropata Taute (Sir Robert Stout).—He patai naku mehemea ranei kua tino tuturu te whakatuunga i tetahi tangata hei Haihana mo te Whare, kei te tarewa ano ranei taua tuunga?

Ko Te Hetana (Hon. R. J. Seddon, te Pirimia o te Koroni).—Kaore ano i tino whakaturia taua tangata, engari ko te hiahia o te Kawanatanga me tere te whakatakoto o taua putake ki te aroaro o te Whare.

No te po o tenei ra ka ara mai ano ia Ta Bopata Taute tana pakanga mo te Haihana mo te Whare, a ka tohe ia ki te Pirimia kia whakamutua a Kanara Pereiha i runga i taua tuunga, a kia riro page 8ma to Whare e whakatu he tangata mo taua mahi. He maha nga mema i korero mo tenei putake, he tautoko ta etahi i te Pirimia he whakahe ta etahi i a ia. Ka roa e korero ana, ko te mutunga iho takoto ana ia Ta Ropata Taute he motini mana, he penei te ahua, ara, me tuku he kupu ki te Kawana, he tono atu ki a ia kia whakaturia e ia tetahi tangata tika hei Haihana mo te Whare. I whakamarama atu ano a Ta Ropata Taute, ko te take i kokiritia ai e ia tana motini, he mahara nona kua takahia e te Pirimia nga ture me te mana hoki o te Whare i runga i te whakatuunga o Kanara Pereiha hei Haihana mo te Whare; otira ma te Whare e titiro, ana rongo i nga korero, kei ta wai te tika, kei tana kei ta te Pirimia ranei.

No ao ake, ara, no te 27 o Hune, i te huihuinga o te Whare, a ka mutu te karakia me etahi mahi poto torutoru nei, ka tu mai.

Ko Te Hetana (Hon.R.J. Seddon, te Pirimia o te Koroni).—Ka mea atu ia ki te Tumuaki me nga mema o le Whare, i te mea kua takoto mai te motini whakahe a Ta Ropata Taute mo ratou ko tona Kawanatanga i runga i te whakatuunga e ratou ia Kanara Pereiha hei Haihana mo te Whare, na reira ki te whakaaro o ratou ko ona hoa Minita he motini turaki tera ia ratou, a i te mea e pera ana te ahua o taua mea me whakanuku etahi atu mahi a te Whare me korero ko taua putake, a me tae rawa ki te pooti taua mea, kia kitea ai kei te tautoko ranei te Whare i Ta Ropata Taute i ta te Kawanatanga ranei. Ka roa te Pirimia e korero ana, ka tu mai ko Kapene Rahera, ko Te Pere, ko Te Hatihana, ko Ta Ropata Taute me. etahi atu, ka mutu enei ka tu mai.

Ko Hone Heke.—E te Pika, ko taku kupu mo tenei mea e takoto nei i te aroaro o Whare, e hiahia toku kia whakamarama ahau mo te taha ki au ake, i te mea i wareware ahau ki te pera i te taima i tautokona ai e au te motini a te mema matamua mo te Taone o Poneke (ara, a Ta Ropata Taute). He mea noku kia whakapuakina e ahau etahi kupu torutoru nei mo runga i taua mea. I tino marama i ahau, a ki taku mahara i nga mema hoki o tenei Whare, i ata tono te mema matamua mo te Taone o Poneke ki te Pirimia kia tukuna e te Pirimia tetahi motini mana inanahi. I whai taima noatu mo taua motini, a i tatari marire te mema matamua mo te Taone o Poneke i mua o tana tukunga i tana motini. Na reira mo te taha ki au ake, e mea ana ahau ki te whakamarama ki te Whare i te take i tautoko ai ahau i te motini i tukuna nei ki te aroaro o te Whare i tenei ra e te mema matamua mo te Taone o Poneke. I mahara ahau e tino mohio ana nga mema honore kaore ana kia whakaritea tetahi tangata hei Haihana mo te Whare. I runga i taku i mohio ai ko te mea tika me whakarite taua tangata i mua o te timatanga o te whakahaere o nga mahi o tenei Whare, na reira i tautokona ai e ahau te motini a te mema matamua mo te Taone o Poneke. Mo runga i tenei motini kaore kau oku mahara tautoko i tetahi taha i tetahi taha ranei o te Whare nei. Ki toku whakaaro me whakatau tenei mea i runga i te tika, a na tenei aronga i tautokona ai e ahau te motini nei. Ki taku titiro he nui te pai e puta mai i tenei motini, notemea i whakaturia pohehetia taua Haihana, a e tika ana kia whakatikaina taua mea.

No te pootitanga hinga ana te motini a Ta Ropata Taute, ara 19 nga mema i a ia, a e 48 i te taha ki te Kawanatanga.