[Translation.]
No. 32 of Session I., 1879.—Pukapuka-inoi a Paremene One One.

Ko te Kai-pitihana he tangata Maori no Haake Pei e ki ana ia i te tau 1869, i tuhia e ia tona ingoa ki tetahi pukapuka mokete na reira i muru tona whenua. E hara i a ia te he notemea kaore i whakamaramatia ki a ia taua pukapuka.

E ki ana ano hoki te Kai-pitihana kua kiia nana i tuhi tona ingoa ki tetahi pukapuka hoko i tetahi whenua ko Raukawa ki te Rato, engari kaore ia i tuhi ki tana mohio heoti ano ko te pukapuka mokete e whakahuatia i runga nei. E mea ana ia kua tahaetia o ratou whenua ko etahi, he mea hoatu he waipiro ki a ratou e tetahi tangata. Na ko taua tangata i oati teka i te aroaro o tetahi Komiti o te Whare Whakatakoto Ture i mea ia kaore ia i pera i tuku waipiro.

E ki ana te Kai-pitihana i tahuri ia ki te whiu i taua tangata i roto i nga Kooti o te ture, engari he maha nga take i kore ai, ko tetahi ko te kore kaore i kaha te Kai-pitihana ki te mea kia puta i roto i te Kooti nga tuhituhinga o te Whare Whakatakoto Ture. No reira ka inoi ia ki to Whare hei hoa whakawa mona i a Hone Kipihana Keneroihi, kia puta he ora ki te Kai-pitihana mo ana moni kua pau i runga i taua whakawa, a tetahi ko nga mate i tau ki runga ki a ia me ona hoa o roto i te karaati me ata hurihuri a ka whakaputa he ora mo reira.

Kua whakahaua ahau kia ki penei:—

Ko te mate e kiia nei he mea i puta i roto i nga ture o te Whare Whakatakoto Ture.

E kitea ana i roto i nga Pukapuka o taua Whare i penei tetahi motini i tu i te 13 o Tihema, 1879, mo tenei korero: "Me whakaae kia puta nga mema me nga apiha o tenei Whare a te wa kore Paramete ki te puaki korero ki te aroaro o te Kooti mo tetahi whakawa e tipu ake ana i roto i nga mahinga i mahia ki te aroaro o te Komiti Whiriwhiri o tenei Whare. Kei to pukapuka o te Whare No. 97, 1871, a, tetahi kia whakamanaia aua apiha ana kiia ake, ki te whakaputa i nga pukapuka me nga tauira o taua Eomiti Whiriwhiri."

E marama ana kei whakaae noa atu te Whare Whakatakoto Ture ki te awhina tika atu i te Kai-pitihana mehemea e hiahia ana ia ki te whakawa i tana take i roto i tetahi Kooti o te ture.