.jpg)
Niuē-fekai (or Savage) Island and its People
Hina-hele-ki-fata
Hina-hele-ki-fata
60. Ko Hina-hele-ki-fata, ko e tama fakahelehele 1a a Patu Hina, kua nofo he lagi tua-ua. Ko e mena tokolalo e lagi ia ne fakatolotolo e tau tagata he toko-lalo, ti hili he tapunu he Pia mo e Tavahi-kaku, ti toko e Maui; ne tu taha hui i Tuapa, ka e tu e taha i Ali-utu, ne fitu e maila mo e maga e mamao he tau hui ua na; ko e pokopoko ua e aloalo-hui a Maui ke he maka he kelekele ke hoko mai he aho nai.
61. Ne fakafano hifo e Hina e tama fakahelehele ke uta afi ke he lagi tua-taha, i lalo, ke he patu ko Moko-fulufulu. Ti age e Moko-fulufulu e tau afi mate vave ma Hina-hele-ki-fata. Kua fano, ti mate he puhala ne fano ai—nakai hoko ki a Hina. Ti liu foki, ti mate foki e afi ia. Ti liu foki, ti age e Moko-fulufulu e ulu hana ke faala e tau kutu, ati tapaki e ia e fifine tapu mo e fakakelea e fifine. Kua hake ke he matua; kua toto e tau hui he tama, ti ta mai e ia e loholoho niu ne tau ai e tau fua mo e fahi e tama.
62. Kua tagi lahi e tama mo e hola, kua nofo e tapa he vailele mo e tahi. Kua tagi atu ke he tau manu-lele, mo e tau manu-totolo, mo e tau ika. Kua o mai e tau ika ki a ia; ti lologo atu e ia, pehe:—
Ka hau ha ika lele totonu,
Kia tele mai ki hinai,
Ka hau ha ika ne tele favale,
Kia tele atu i hinai.
63. Kua o mai e tau ika loga, ati ui atu e ia. “Ko e hau a koe ke ha?” Ti vagahau atu e ika, “Kua hau au ke ta mai he tino ke tohi e koe !” Ati tohi e ia e tau tino ha lautolu, kua ivaiva mo e ilaila, kua kula, mo e mata-ono atu ki a Hina-hele-ki-fata. Ti ta mai e ia mo e tuku he mua hana. Kua hau e magō, kua ui atu e fifine, “Ko e hau a koe ke ha ?” Ti pehe, “Ne hau au ke ta mai he nifo ke hifi aki e ulu hau.” Ti ita e fifine mo e tu hake, ti mimi atu ke he tino he mangō.
64. Kua hau fakamui e Fonu, ha ne kakau mai ko e fakahikuaga ia he tau ika. Ne huhu atu a Hina, “Ko e hau a koe ke ha ?” Ti vagahau age e Fonu, “Kua hau au ke ta mai he na una ke tau aki ho na penapena.” Ati nava atu e fifine ki a ia; kua hifo mo e heke ai he tua hana. Ko e tau fua-niu e oho ko e hifo ne fai. Kua vagahau age e Fonu, “Ka inu e niu, ti ui mai, to fakakite e au taha mena ke fela ai ke kai ai koe.” Kua inu e Hina-hele-ki-fata, kua maha; ti nakai ui age ko e fe e mena ke fela ai e fua-niu, ka e toto e ia ti fela fakalahi ke he tumuaki-ulu he Fonu, ati omoi hifo e ulu he Fonu ki loto mo e fakamemege he mamahi, ati ulu-tomo ai e Fonu ke hoko mai ke he aho nai.