Tēnei kua kite au i tētahi pānui no Mataniho, Waimaha, na Hukanui rāua ko Mouru, e mea ana, he mana tuku atu na Rua[290] me tōna iwi kia riro ma rāua e pānui ki nga iwi o Niu Tireni, ki a Takitimu, ki a Mataatua, ki a Te Arawa, ki a Tainui, ki a Aotea, me nga hāhi o te ao, me nga poropiti. Kei te mōhio koutou ki nga kupu o taua pānui. Ko te kaupapa o taua hui he Kirimete. Ki taku titiro te hua o tēnei pōhiri he whakawhawhai i nga hāhi, he whakawhawhai i nga poropiti. Tōna tikanga ko Rua te tino poropiti, nōna te tino hāhi, ina hoki ki taua hui ka tuki nga pea[291], a te pea tika e mau nga moni. E kore taku huihui e tae mo ēnei take, engari i rongo mātou e riri ana tōna iwi, engari e kii ana ētahi ki te kii a Rua ka ringihia e ia ana kupu ki taua hui i nga rā e rua e toru. Koia na he kai ma nga mano tāngata, kei a te Karaiti tuarua. Arā kē aku hui mīharo he hui kimi i nga ture mo te motu, ko nga hui pōrangi, hei aha.

Na Numia Kereru[292]