Other formats

    TEI XML file   ePub eBook file  

Connect

    mail icontwitter iconBlogspot iconrss icon

Nga kōrero a Reweti Kohere Mā

Te Kuihi i te Hua Koura

Te Kuihi i te Hua Koura

He manu ta tētahi tangata, he kuihi. I ia rā, i ia rā, e whānau tonu ana he hua ma taua manu, kotahi hēki i te rā, he hēki koura. Whānau tonu mai he hua manu ma taua tangata, whakapaua tonutia atu e ia kua tatari kia whānau mai anō tētahi; nāwai rā ka noho tonu te tangata nei i te taha o te kōhanga tatari ai ki tana hēki koura. I te mea kua kaha rawa tōna minamina ki te koura, ka puta te whakaaro ki tōna ngākau mehemea ki te patua e ia tana manu, a, kāhore ana mahi tatari ki te wā rawa e whānau ai. Kātahi ka patua e te tāhake nei tana manu. No te tuakanga i te puku, aue, kotahi anō ia te hēki kāhore i tino pakari rawa. No te paunga o tēnei hēki ko te mutunga o te whiwhi o te tangata nei i te hēki koura i ia rā, i ia rā, notemea kua patua hoki e ia te kōtua.

E te iwi, he kōrero pūrākau tēnei na te Pākehā, he kupu whakarite, kaati me titiro e tātou te ekenga mai o ēnei kupu whakarite ki a tātou, ki te Iwi Maori. Me kii pēnei ake, ko te tangata nei ko te Maori, ko tana kuihi ko te whenua, e mārama ana te hua. Ko te hua tonu o te whenua e ngāwari noa hei whakahuri hei koura, hei moni. E whiwhi ai te tangata ki te hua o tōna whenua ma te mahi, ma te heke o te werawera, ā, ma te tatari mo nga tau maha. E kii rā a Hemi, 'Na tūmanako tonu te kainga ki nga hua utu nui o te whenua, he mea tatari marie atu nāna, kia tae mai rānō to mua me to muri na.' Ko te mahi ahuwhenua he mahi uaua, he mahi roa ki te tatari ki nga hua, otirā tērā anō nga mea e hohoro tonu te puta mai, arā, ko nga kai o te whenua, page 195 he miiti, he wāhie, he whare, arā, ka patu i ta rātou manu. Kua pau noa atu te hēki koura te kai, kua noho noa iho ināianei. Ko nga iwi tōtika ināianei kei te mau tonu ki o rātou whenua kei te whāmu te whenua i ia rā, i ia rā, i nga hua koura.

Te Pīpīwharauroa, 1907.

He whakamārama: Na Reweti Kohere te ingoa mo tēnei kōrero.Kaore i kitea ko wai te kaituhi, ko te ingoa ake kei Te Pīpīwharauroa nama 10, Aperira 1907. Whārangi 6, ko 'Te Kuihi i Nga Hua Koura'.—Nga Etita