Takarokaro noa ana, te Whetu Maori o runga;
Ka momoe nga uruahu o Rehua i te rangi,
Mana e whakamana Uenuku-kopako
Te atua tawhanawhana; mei ahatia hoki;
Na Wari-a-hau, nana i kapo matamata i te riri
Te whakaaro ai, ka whati nga Rata whakaruru o runga
Hei kawe mohou (mou) ki te Mata-whaura, i.
Te puta tu awatea, i runga te Wai-tawa.
Pae ana te Pakake, i te nui a Te-tu;
Kei a Rangi-a-te-ama, e rurea te toka mataho
Ka tupoki te waka, e.
Taku awe Kotuku no nga rakau a Te-ru, e.
Puhia mai nei, e te hau muri, pa whakarua;
Taku mahuri Totara, e tu ki te rakau a Hine-tapeka;
Tena ka paea, nga matawai o Roto-ehu;
Pohehe noa o teina i te ao.
Whakamau tahi atu te titiro, te pae ka riakina
Ko Rangi-toto e tu kau mai ra,
Ka maunu te Taniwha i te rua,
I murua atu i te Uru.
Nga tuatara no Matea, nau ra iana,
Kei whakangawari nga hau kaha mai o tawhiti;
O te turanga i takina mai ai.
Ko te ika kino a Tu.
Ko to tupuna kei a Tuku-a-hika e, i.
Rangaranga te hau o te whenua.
Tutu nga tangata. I moea ki te po,
Huri nui e te hinengaro, e puanu kino ana
Te puanu o te hukarere;
Kei roto e kani ana, te hau marama mate,
O Te-tama-tea, o Tama-i-te-ngaua,
E moe iho ra i te Whare-rangi.
Tahi au e te hoa, he whakahuru kore
Mo to kiri; tawharua nei ki te
Muka haroharo o te Ra-whiti.
Tu ake tama i te ata, kaore he korero,
I puaki, kia whatiia i te rara
O te karakia; kia hirihiri koe,
I te Pouawhi, i te Wharangi
I te Awatea-roa, i te Manuka, i Whaka-tane;
Ko te ara tena o to Tupuna
O Wai-ra-kewa i kau mai ai i tawhiti e, i.

He tangi tawhito mo Te-rakau, a he tangi ma te iwi
katoa mo nga tupapaku ariki.